Premer-Mınıstr aldymen oblys ortalyǵyndaǵy «Enkı» kirpish zaýytynda boldy. Kirpish zaýyty 2010 jyldyń jeltoqsan aıynda Indýstrıalandyrý kartasy sheńberinde iske qosylǵan bolatyn. 2015 jyldyń úshinshi toqsanynda tolyq jobalyq qýatynda jumys isteı bastady. Kásiporyn jyl saıyn 60 mıllıon danaǵa jýyq kirpish shyǵarady.
Budan soń Premer-Mınıstr oblys ortalyǵynyń irgesinen 2013 jyldan bastap boı kótergen Saryarqa shaǵyn aýdanynda boldy. Alǵashqy jyly jalpy kólemi 62 386,7 sharshy metrdi quraıtyn 1295 páterlik 33 kópqabatty turǵyn úı salyndy. Odan bólek 240 oryndyq balalar baqshasy paıdalanýǵa berilse, quny 1 mıllıard 134 mıllıon teńge turatyn órt sóndirý stansııasy iske qosyldy. 900 oryndyq IT mektep-lıseıi de osynda. Saryarqa shaǵyn aýdany az ǵana jyldyń ishinde kóztartarlyq bolyp qaýlap ósip keledi. 2014 jyly 30 páterlik 5 úı boı kóterdi. Qurylys alańyn aralap kórgen Premer-Mınıstr aldymen turǵyn úılerdiń sapasyna nazar aýdardy. Bolashaqta taǵy da 14 kópqabatty turǵyn úı salynbaq.
Kókshetaý halqyn eleń etkizetin jaǵymdy jańalyqtyń biri – balalar men jasóspirimderge arnalǵan «Bolashaq» saraıy. Jobanyń quny 6,5 mıllıard teńge. Jalpy kólemi jeti myń sharshy metrdi quraıdy. Ǵımarat eki bólikten turady. Birinshisi ıntellektýaldyq damýdy qalyptastyratyn aımaq bolsa, ekinshisi sport alańdary.
Oblys ákimi Ermek Marjyqpaev Premer-Mınıstrdi «Bolashaq» saraıynyń jobasymen egjeı-tegjeıli tanystyrdy. Úkimet basshysy qurylys jumysyn sapaly júrgizýmen qatar, ǵımarattyń tóńiregin abattandyrýǵa kóńil bóldi.
Kókshetaý qalasynyń ortalyǵyndaǵy «Dostyq» jáne «Kókshetaý» qonaq úılerinde bolǵan Úkimet basshysy mundaǵy qyzmet kórsetý sapasyn jaqsartý jáne jańa zamanǵy jıhazdarmen jabdyqtaý qajet ekendigin eske saldy. Sondaı-aq Premer-Mınıstr oblys ortalyǵyndaǵy «GreenWhich Hotel» qonaq úıinde de boldy. Bul qonaq úıde standart, jartylaı lıýks, lıýks sanatyndaǵy 26 bólme bar. Artyqshylyǵy ákimshilik mekemeler men mádenı nysandarǵa jaqyndyǵy. Qonaq úıdiń bólmeleri kondısıonermen, spýtnıktik telearnalarmen, seıfpen jáne basqa da qajetti jabdyqtarmen jaraqtandyrylǵan.
Premer-Mınıstrdiń endigi bir nazar aýdarǵan jaıy – jol máselesi. Burnaǵy jyldary respýblıkalyq mańyzdaǵy Astana-Petropavlovsk baǵytyndaǵy tas joldyń Kókshetaýdan Petropavlǵa deıingi bóliginiń jaıy syn kótermeıtin. Qazirgi kúni kúrdeli jóndeýden ótkizildi. Kúre joldy kúrdeli jóndeýden ótkizýge 3 606,4 mıllıon teńge qarjy bólingen bolatyn. Aýqymdy jumysty «Qazaqdorstroı» jaýapkershiligi shekteýli seriktestigi júrgizdi.
Bulandy aýdanyndaǵy «Makınka qus fabrıkasy» jaýapkershiligi shekteýli seriktestigi elimizdegi biregeı joba. Munda 2018 jyly quny 1,974 mıllıard teńgeni quraıtyn 3189,65 tonna qus eti óndirildi. 2019 jyly 14396 tonna et óndirýdi josparlap otyr. Tolyq qýatynda jumys istegen kezinde 900-ge taıaý adam jumys isteıtin bolady. Jumysshylardyń ortasha aılyq eńbekaqysy 200 000 teńge kóleminde.
Aqmolanyń yryzdyǵy – aqyq dáninde. Qazir oblys dıqandary kúzgi egin oraǵynyń qamynda. Erte pisetin arpany iriktep oryp ta jatyr. Úkimet basshysy Bulandy aýdanyndaǵy «Jýravlevka-1» jaýapkershiligi shekteýli seriktestiginde bolyp, kúzgi dala jumystarynyń barysymen tanysty.
Aqmola oblysy
