Tártip saqshylary bala eńbegin paıdalanýy múmkin degen mekemelerdi súzip shyqty. Qazaqstan Respýblıkasynyń Eńbek týraly Kodeksine sáıkes, balalarǵa 14 jastan bastap jumys isteýge ruqsat etiledi. Tek, olardyń jumys ýaqyty aptasyna 24 saǵattan aspaýǵa tıis. Al, 16 jastan 18 jasqa deıingi jasóspirimderdiń jumys ýaqyty aptasyna 36 saǵattan aspaý kerek. Sondaı-aq, kámeletke tolmaǵandarǵa túngi ýaqytta jumys isteýge, aýyr, qaýipti eńbek jaǵdaılaryna baılanysty jumystardy oryndaýǵa tyıym salynady.
Osy máselelerdi baqylaýda ustaý, kámeletke tolmaǵandarǵa qatysty eleýli quqyq buzýshylyqtar men qylmystardyń jasalýyna jol bermeý úshin polıseıler birqatar kólik jýý oryndaryn, dámhanalardy, oıyn-saýyq mekemelerin tekserdi. «Jumyspen qamtý» reıdi barysynda túngi ýaqytta oıyn-saýyq oryndaryna barǵan kámeletke jasy tolmaǵan jetkinshekterdiń ata-analaryna zań talaptary túsindirildi. Máselen, kompıýterlik klýbta 2002 jyly týǵan jasóspirimderdiń otyrǵany anyqtalyp, nátıjesinde osy mekemeniń ıesine ákimshilik jaza taǵaıyndaldy.
Ústimizdegi jyldyń jeti aıynda kámeletke tolmaǵandarǵa ishimdik ishkizgen 11 adam ákimshilik jaýapkershilikke tartylyp, jıyrma bir jasqa deıingi jastarǵa alkogol ónimin satqany jaıly 28 hattama toltyrylǵan. Jasóspirimderdiń túngi ýaqytta oıyn-saýyq mekemelerinde bolýyna jol bergeni úshin 46 hattama toltyrylyp, balalardy qoǵamǵa jat is-áreketter jasaýǵa ıtermelegeni úshin Qazaqstan Respýblıkasy Qylmystyq Kodeksiniń 133-baby boıynsha 85 azamatqa aıyppul salyndy.
