Sonyń ishinde 2017 jyly 426,4 myń sharshy metr turǵyn úı alańy paıdalanýǵa berilip, jospar 2016 jylmen salystyrǵanda 116,9 paıyzǵa oryndaldy. 2018 jyly bul kórsetkish 478 myń sharshy metrdi qurap, jospardyń 112,1 paıyzǵa oryndalýyna qol jetkizildi. Al, bıylǵy jyldyń 7 aıynda kórsetkish 323 myń sharshy metr nemese 103,5 paıyzǵa teń boldy.
Qurylys jumystarymen oblys aýdandary men qalalary da keńinen qamtylǵan. Bıyl jalǵa beriletin turǵyn úı qurylysy boıynsha respýblıkalyq bıýdjettiń esebinen 3,5 mıllıard teńgeniń 23 turǵyn úıin paıdalanýǵa berý qarastyrylyp otyr. Oblystyq bıýdjet esebinen taǵy 8 joba iske asyrylmaqshy. Qazirdiń ózinde osy kózdelgen turǵyn úılerdiń 9,5 myń sharshy metri paıdalanýǵa berilip, turǵyndar ıgiligine tapsyryldy.
Sońǵy ýaqytta turǵyn úılerdiń kóptep salynýynan kópbalaly otbasylaryna jáne áleýmettik jaǵynan az qamtylǵan otbasylardy pátermen qamtamasyz etý kórsetkishi anaǵurlym artty. Jalǵa beriletin turǵyn úı qurylysyn óristetýdiń esebinen jyl aıaǵyna deıin oblys boıynsha taǵy da qosymsha 148 kópbalaly otbasynyń baspanaly bolýyna jaǵdaı týǵyzylǵaly otyr.
Oblysymyzda turyn úı qurylysy qarqynyn arttyrý úshin 2014 jyly Kókshetaý qalasynda turǵyn úı qurylysy kombınaty ashyldy. Búgingi kúnge deıin kombınat kópqabatty bes turǵyn úı qurylysyn júrgizip, paıdalanýǵa berdi. Kásiporyn qýatyn arttyrý úshin qurylys basqarmasy osy kombınat tehnologııalaryn keńinen paıdalana otyryp, úı salýdyń bes jyldyq josparyn jasaýda. «Aqmola jastary» baǵdarlamasy boıynsha oblys bıýdjetinen kóp qabatty eki úıdiń qurylysyn júrgizýge de tıisti qarjy bólingen.
Búgingi tańda Qopa kóline jaqyn mańda jobalyq quny 6,5 mıllıard teńgeniń «Bolashaq» balalar men jasóspirimder saraıynyń qurylysy bastaldy. Sondaı-aq, bıyl kúzde Qopa kóliniń jaǵasymen ótetin jol qurylysy qolǵa alynbaq. Qazirgi ýaqytta oblystyq onkologııalyq emhananyń qurylysy, oblys ortalyǵyndaǵy №1 orta mekteptiń 600 oqýshyǵa arnalǵan qosymsha ǵımaratynyń qurylys jumystary, basqa da osy tektes jumystar qyzý qarqyn alǵan.
Aqmola oblysy
