Is-shara óńirdegi qaýipsizdikti qamtamasyz etý boıynsha aımaqtyq yntymaqtastyqty nyǵaıtý sheńberinde ótkiziledi. Memleket basshylary ótken jylǵy 15 naýryzda Astana qalasynda ótken kezdesý barysynda ózara is-áreketterdiń osyndaı jańa formatyna bastamashylyq jasaǵan bolatyn.
Keńes jumysyna Qazaqstan ishki ister mınıstri E.Z. Turǵymbaev, Tájikstan ishki ister mınıstri R.H. Rahımzoda, О́zbekstan ishki ister mınıstri P.R. Bobojonov jáne Qyrǵyzstan IIM О́kilettti ýákili A.K. Dolosbaev, ishki ister mınıstrlikteri ortalyq apparattary qyzmetteriniń, sondaı-aq shekara mańyndaǵy óńirler ishki ister organdarynyń basshylary qatysty.
Kezdesý barysynda ishki ister organdarynyń zańsyz kóshi-qonǵa qarsy kúres, qylmyskerlerdi izdestirý salasyndaǵy, sondaı-aq shekara mańyndaǵy óńirler IIO-nyń bóten múlikti urlaýǵa qarsy kúreste ózara baılanysynyń ózekti máseleleri qaraldy.
«Cholpon-Ata qalasynda ótken birinshi Keńesten beri bir jyl ýaqyt ótti. Yntymaqtastyqtyń osyndaı jańa formaty týraly bastama ótken jyly 15 naýryzda Astana qalasynda ótken memleket basshylary basqosýynda kóterilgen bolatyn. Búgin bizge ózara kelisimge ótken jyly qol jetkizildi dep aıtýǵa negiz bar. Bul yntymaqtastyq, ásirese shekaralyq óńirlerdegi baılanystyń odan ári nyǵaıýyna serpin berdi. Biz qyrǵyzstandyq, tájikstandyq jáne ózbekstandyq áriptestermen ekijaqty, kópbaǵytty formatta tabysty qyzmet atqaryp kelemiz. ShYU aıasynda jáne basqa da halyqaralyq uıymdarmen baılanysa otyryp, TMD aýmaǵyndaǵy qylmyspen kúrestiń birlesken baǵdarlamalaryn iske asyramyz. Esirtki qylmysy, terrorızm jáne ekstremızm, zańsyz kóshi-qon, sondaı-aq transulttyq uıymdasqan toptarmen baılanysty jalpy qaýip-qaterdiń ósýi bizden Ortalyq Azııa aýmaǵynda birlesip osyndaı qylmys túrlerimen kúresýdi talap etedi. Sondyqtan bizdiń strategııalarymyz ben ózara baılanysymyzdyń ádis-tásilderin jetildirýdi keshendi túrde qolǵa alý qajet. Osy turǵydan kelgende bizdiń Keńesimiz múmkin bolatyn qaýip-qatarlerdiń aldyn alýǵa baǵyttalǵan ýaqytyly sheshimderdi qabyldap, ózekti máselelerdi talqylaýdyń qolaıly alańy bolyp tabylady», dep málimdedi IIM Basshysy Erlan Turǵymbaev.
Otyrys qorytyndysy boıynsha ishki ister mınıstrleri keńes Hattamasyna qol qoıdy.
Buǵan qosa, delegasııa basshylary transshekaralyq qylmysqa qarsy kúreste Ortalyq Azııa óńiri memleketteriniń ishki ister organdarynyń kúsh-jigerin úılestirýshi óńirlik konsýltatıvtik-keńesshi organ retindegi Keńes qyzmetiniń quqyqtyq negizderin bekitti.
