Bıylǵy básekede bes komanda baq synady. Qurlyqtyq hokkeı lıgasyna daıyndyq ispetti týrnırge «Barys» (Nur-Sultan), «Ak Bars» (Qazan), «Neftehımık» (Nıjnekamsk), «Avtomobılıst» (Ekaterınbýrg) jáne «Salavat Iýlaev» (Ýfa) klýbtary qatysqan bolatyn. Tamyzdyń 7-11 tamyz aralyǵynda ótken muz ústindegi básekeniń ashylý saltanatyna Qazaqstan Prezıdenti Qasym-Jomart Toqaev qatysyp, «Barys» jáne «Ak Bars» klýbtary arasyndaǵy oıyndy tamashalady. Qurlyqtyq hokkeı lıgasynyń (QHL) úsh dúrkin jeńimpazyna qarsy ótken oıynda jerlesterimiz 6:1 esebimen basym tústi.
Kezdesýdegi alǵashqy shaıbany «Barys» sapynan 7-mınýtta Nıkıta Mıhaılıs soqty. Al 11-mınýtta «Barystyń» eks-oıynshysy Mett Frettın tarazy basyn teńestirdi. Bul Qazan klýbynyń matchta soǵylǵan eń birinshi jáne eń sońǵy shaıbasy boldy. Oıynnyń qalǵan bóliginde «Barys» hokkeıshileri ústemdik qurdy. Birinshi kezeńde Kırıll Panıýkov pen «Barys» qataryna bıyl qosylǵan kanadalyq Adam Helevka shaıba soqsa, ekinshi 20 mınýtta Dastın Boıd pen Darren Dıs jáne Batyrlan Muratov mergendigimen kózge tústi. Osylaısha «Barys» alǵashqy kezdesýde iri eseppen jeńiske jetti.
Ekinshi oıynyn «Neftehımık» klýbyna qarsy ótkizip, kambek jasady. Kezdesýdiń birinshi kezeńinde 1:3 esebimen jeńilip jatqan elorda komandasy 5:3 esebimen jeńisti qarsylastan julyp aldy. Bas bapker Andreı Skabelka «Ak Barsty» iri eseppen jeńgen soń, negizgi quramnyń oıynshylaryna demalys bergen bolatyn. Sondyqtan oıynnyń basy qonaqtardyń basymdyǵymen ótti. 23-sekýndta Zak Mıtchell esepti ashsa, artynsha Pavel Porıadın esepti 0:2-ge jetkizdi. Degenmen Nıkıta Mıhaılıs 14-mınýtta esepti bir shaıbaǵa qysqartty. Ekinshi kezeńniń 25-mınýtynda Aleksandr Avsın «Neftehımıktiń» úshinshi shaıbasyn soǵyp ketti. Osydan keıin «Barys» oıynda ózgeris jasap, oıyn tizginin óz qolyna aldy. Iаroslav Evdokımov pen Dastın Boıd bir-birden shaıba soǵyp esepti teńestirse, úshinshi kezeńde Boıd dýbl avtory atandy. Kezdesýdiń núktesin Nıkıta Kleshenko qoıdy.
Úshinshi kezdesýde «Avtomobılıst» komandasyn qabyldap, asa tartysty ótken matchta «Barys» 3:2 esebimen basym tústi. Báseke bastalǵan bette oıyn tizginin qolyna alǵan alań ıeleri birinshi kezeńde qarsylas qaqpasyn eki márte dál kózdedi. Shaıba avtorlary – Dmıtrıı Shevchenko men Iıro Pakarınen. Ekinshi kezeńde Nıkıta Mıhaılıs «Barystyń» úshinshi shaıbasyn soǵyp, komandasynyń jeńisin naqtylaı tústi. Úshinshi kezeńde qonaqtardyń eki shaıba salýǵa shamasy jetti.
Osylaısha «Barys» sońǵy oıyn-
nyń nátıjesine qaramaı-aq Qazaqstan Prezıdentiniń kýbogyn kezekti márte jeńip aldy. О́ıtkeni týrnır kestesinde «Barystan» keıingi orynda turǵan eki komanda da jerlesterimizden jeńilgen. «Barys» tórtinshi kezdesýde jeńilgen kúnniń ózinde de, jeke kezdesý boıynsha alda tur. Osylaısha «Barys» aldyn ala jarys jeńimpazy atandy.
Aıta keteıik, 2010 jyldan beri ótkizilip kele jatqan Prezıdent kýbogy básekesinde Sankt-Peterbýrgtiń SKA, Ombynyń «Avangard», Novokýzneskiniń «Metallýrg», Nıjnekamskiniń «Neftehımık» jáne Habarovskiniń «Amýr» klýbtary bir retten jarys jeńimpazy atanǵan.
