Aımaqtar • 13 Tamyz, 2019

Dala órti damyl bermeı tur

566 ret

kórsetildi

3 mın

oqý úshin

Jaqynda Reseıdiń Sibir ólkesindegi bir Belgııa memleketiniń kólemindeı aýmaqty sharpyǵan alapat órt tórtkúl dúnıeni alańdatqany belgili. Kórshi eldegi tilsiz jaýdyń kók tútininiń lebi bizge de jetkende «osyndaı jaǵdaıǵa qanshalyqty daıynbyz?» degen saýaldyń týyndaǵany ras.

Azamat QASYM

Mine, birneshe aptadan beri elimizde mı qaınatar ystyq tolastamaı tur. Qapyryq aýanyń kesirinen óńirde órt oqıǵalary da jıilep ketti. Ásirese ashyq alqaptardaǵy qurǵaq shóptiń janý derekteri sońǵy kúnderi kóp tirkelip otyr. Oblystyq Tótenshe jaǵdaı departamenti baspasóz qyzmetiniń taratqan derekterine súıensek, aımaqta tek eki táýlikte 10 órt oqıǵasy tirkelip, órt sóndirýshiler tórt birdeı aýdanda aıtyp kelmeıtin apatpen arpalysypty (Jarma, Aıagóz, Besqaraǵaı jáne Semeı shaharynyń mańy).

«Osy kúnderi oblys boıynsha qurǵaq shópti sóndirýmen jeke quramnyń 42 adamy men 10 arnaıy tehnıka jumys istedi. Bul jumysqa sharýa qojalyqtary men orman sharýashylyqtarynyń 30-ǵa jýyq qyzmetkeri de jumyldyryldy» deıdi oblystyq Tótenshe jaǵdaı departamenti baspasóz qyzmetiniń mamany Anastasııa Sklıar.

10 tamyzda Kúrshim aýdanynyń Quıǵan aýylynan 15 shaqyrym jerde órt shyǵyp, 800 gektar aýmaq qyzyl jalyn qursaýynda qalǵany, ony sóndirýge tótenshe jaǵdaı, jergilikti atqarýshy organdar jáne orman sharýashylyǵy tarapynan 39 adam men 9 arnaıy tehnıka jumyldyrylǵany týraly aqparat tarady.

«Saqtansań – saqtaıdy» deıtin halyqpyz. Al órtten qalaı saqtanýǵa bolady? Dala órtiniń tutanýyna ne sebep? Oblystyq Tótenshe jaǵdaı departamentiniń mamandary dala órtiniń shyǵýyna negizgi eki sebep baryn, biri adamdardyń abaısyzdyǵy, ekinshisi naızaǵaıdyń túsýi ekendigin aıtady. «Orman alqaptary kún saıyn ǵarysh arqyly baqylanady. Al sońǵy aptalardaǵy qurǵaq shóptiń janý derekteri tirkelgenimen eshqandaı materıaldyq shyǵyn kelgen joq. О́rt eldi mekenderden alys aýmaqta. Degenmen arqany keńge salýǵa bolmaıdy. Keıde malshylar mal qarap júrip mingen tehnıkasynyń murjasynan ushqyn túskenin ózi de ańǵarmaýy múmkin. Keıbir adamdar terezeden shyny bótelkeni laqtyryp ketedi. Áıneginiń kúnge qyzýynan qýraǵan japyraqta ot tutanýy ábden múmkin. Ańshylar nemese jaı adamdar dalada oq atýy múmkin. Oq qaldyǵynan da ot shyǵady. Osynyń bári órttiń shyǵýyna sebep bolady. Sonymen qatar sharýa qojalyqtaryna egistik alqaptaryna jumys isteýge shyǵar aldynda aýylsharýashylyq tehnıkalarynyń jaǵdaıyn muqııat teksertip alsa deımiz», deıdi A.Sklıar.

О́SKEMEN