Tóraǵanyń nátıjeli sapary
Sársenbi, 29 mamyr 2013 1:49
Parlament Májilisiniń Tóraǵasy Nurlan Nyǵmatýlın Qyzylorda oblysyna arnaıy saparmen keldi. Mártebeli meımandy aımaq basshysy Qyrymbek Kósherbaev kútip alyp, óńirde atqarylyp jatqan jumystarmen tanystyrdy.
Jalpy, adamdar «Nur Otan» partııasynyń qoǵamdyq qabyldaýlaryna úlken úmit arqalap keledi. Bılik partııasynyń tabaldyryǵyn attaǵan árbir azamat óz máselesiniń sheshiletinine senedi.
Sársenbi, 29 mamyr 2013 1:49
Parlament Májilisiniń Tóraǵasy Nurlan Nyǵmatýlın Qyzylorda oblysyna arnaıy saparmen keldi. Mártebeli meımandy aımaq basshysy Qyrymbek Kósherbaev kútip alyp, óńirde atqarylyp jatqan jumystarmen tanystyrdy.
Jalpy, adamdar «Nur Otan» partııasynyń qoǵamdyq qabyldaýlaryna úlken úmit arqalap keledi. Bılik partııasynyń tabaldyryǵyn attaǵan árbir azamat óz máselesiniń sheshiletinine senedi. Onyń syrtynda, qoǵamdyq qabyldaýlarda zańnamalyq keńes alýǵa, mańyzdy memlekettik baǵdarlamalar týrasynda keńinen málimetke qanyq bolýǵa múmkindik molynan bar. Bul elmen etene aralasýdyń bir quraly ekenin dáleldep jatýdyń ózi artyq. Al ortalyqtan alys jatqan eldi mekenderge qoǵamdyq qabyldaýdyń ókilderi ózderi barady. El ishindegi problemalardy kózderimen kórip, ony sheshý joldaryn qarastyrady.
«Nur Otannyń» Parlamenttegi fraksııasynyń jetekshisi Nurlan Nyǵmatýlınniń Qyzylorda oblysynda jumys saparyn osyndaı qoǵamdyq qabyldaýdan bastaǵany da zańdy kórindi. Májilis Tóraǵasynyń qabyldaýyna azamattar túrli saýaldarmen keldi. Jáne ózderin mazalaǵan máselelerdiń sheshimin taýyp qaıtty. Mysaly, «Aq-Barys» sharýa qojalyǵynyń tóraǵasy Erbolat Rsalıev «Sybaǵa» baǵdarlamasy boıynsha sýbsıdııa alýǵa múmkindik qarastyrýdy surady. Atalǵan sharýashylyq «Halal» standartymen ónimder shyǵarady. Olardyń ónimderi halyq arasynda úlken suranysqa ıe. Jergilikti kásiporyndar, mektepter, medısınalyq mekemeler osy qojalyqtyń ónimderin paıdalanady. Búginde sharýashylyqta mal soıatyn seh, 200 bas iri qara maldy jemdeýge arnalǵan oryn bar. Sharýashylyq jetekshisi endi qolda bar sehty úlkeıtip, mal jemdeıtin oryndy 500-ge jetkizýdi oılap otyr eken. Sol úshin «Sybaǵadan» sybaǵa alýdy maqsat tutady. Bolashaǵy bar, elge paıdasy zor jobaǵa Nurlan Zaırollauly da qoldaý bildirdi.
Qabyldaýǵa kelgen azamattardyń biri – Valentına Levkına. Ol – balalar úıiniń tárbıelenýshisi. Qolynda bir uly bar. «Jasóspirimder úıinde» turyp kele jatqanyna on jyl bolǵan. Endigi basty armany – baspanaly bolý. Májilis Tóraǵasymen ol da oı-armanyn bólisti. Taǵdyrdyń teperishin az kórmegen jas anaǵa Nurlan Nyǵmatýlın jazǵa deıin jańa baspanaǵa ıe bolatynyn aıtty. Sonymen qatar, ol jetim balalardyń baspana quqyn zań júzinde bekitýdiń de qarastyrylatynyn jetkizdi.
N.Nyǵmatýlın «Nur Otan» partııasynyń qabyldaý júıesi eń aldymen Elbasymyz júktegen áleýmettik máselelerdi sheshýdiń basty tetigi ekenin aıtty. Bıyl partııanyń Qyzylorda oblystyq fılıalyna myńnan asa adam habarlasqan. Aqmeshittik aǵaıyndy eńbekpen qamtý, turǵyn úı-kommýnaldyq sharýashylyq salasy, jalaqynyń tólenbeýi sekildi ózekti máseleler tolǵandyrady eken. Jumystyń tıimdiligin arttyrý maqsatynda oblystyq fılıal kóshpeli qabyldaýlar, temir joldaǵy qabyldaý, «Qazaqtelekomda» qoǵamdyq qabyldaý bólimin ashý sekildi túrli pishindegi kezdesýler ótkizip keledi.
Qoǵamdyq qabyldaýdan soń Nurlan Nyǵmatýlın bastaǵan meımandar «Jastar úıiniń» jumysymen tanysty. Ol byltyr paıdalanýǵa berildi. Birinshi qabatynda 23 jasqa deıingi tárbıelenýshiler turady. Ol jataqhana sekildi jasalǵan. Al odan joǵary qaraı 29 jasqa deıingi azamattarǵa páter retinde beriledi. Bul balalar úıinde tárbıelenip, 23 jastan keıin memleket qamqorlyǵynan tys qalatyn jastar úshin eń qolaıly tásil bolyp tur. Olar 29 jasqa deıin bilimin alyp, otbasyn quryp, jumysqa ornalasyp, baspana máselesin sheship alǵansha osy oryndy meken etedi. Al munyń jastarǵa jasalǵan úlken qamqorlyq ekeni aıtpasa da túsinikti.
Ortalyqtyń jumysymen tanysyp shyqqan soń Májilis Tóraǵasy jýrnalısterge arnaıy suhbat berdi.
– Áýejaıdan túskennen keıin-aq Qyzylorda oblysynda úlken jumystardyń atqarylyp jatqany kózge birden kórindi. Jańa joldar salynyp, qurylys alańdary tynymsyz jumys istep, sonyń nátıjesinde turǵyn úıler men ǵımarattar boı kóterip jatyr eken. Aımaqta Elbasynyń tapsyrmalary tyńǵylyqty oryndalyp jatqanyna kýá bolyp otyrmyz. Oblys basshysy aımaqta qolǵa alyný ústindegi baǵdarlamalar týraly aıtty. Al onyń barlyǵy elimizdiń órkendeýine eleýli úles qosady dep senemiz,– dedi Nurlan Zaırollauly.
Májilis Tóraǵasynyń jumys sapary odan soń Baıqońyr ǵarysh aılaǵynda jalǵasty. Meımandar birqatar mańyzdy nysandardy aralap shyǵyp, «Baıqońyr» ǵarysh aılaǵy murajaıynyń jumysymen tanysty. Onan soń «Soıýz-TMA-09M» ǵarysh kemesiniń ushyrylýyn tamashalady.
Erjan BAITILES,
«Egemen Qazaqstan».
Qyzylorda oblysy.
