Qazaqtyń qaısar oǵlany kezdesýdi stadıonnan tamashalap qana qoımaı, match sońynda ÝEFA prezıdenti Aleksandr Cheferınmen birge jeńimpaz komandaǵa altyn medal men kýbokty tapsyrdy.
Osyndaı aıtýly sharaǵa qatysqan otandasymyzdyń erligi Qazaqstan Prezıdenti Qasym-Jomart Toqaevtyń da nazarynan tys qalǵan joq. Memleket basshysy óz kezeginde Álıge jyly lebizin bildirdi. «Jas qazaqstandyq Álı Turǵanbekov ÝEFA Sýper kýbogy úshin «Lıverpýl» men «Chelsı» arasynda ótken matchtyń jeńimpazyn marapattaý saltanatyna qatysty. «Álı, seniń maqsatqa jetý jolyndaǵy kúsh-jigeriń álemde talaı adamdy alǵa jeteleıdi. Barlyq armandaryń oryndalsyn!», dep jazdy Prezıdent Twitter-degi paraqshasynda.
О́mirge eki aıaqsyz kelgen Álıdiń qýanyshyn, keshegi keshten alǵan áserin bólisý maqsatynda anasy Aqmaralmen tildesýdiń de sáti tústi.
– Álıdiń keshegi keshten alǵan áserin sózben aıtyp jetkizý múmkin emes. Balamnyń qýanyshyn kórgende tóbem kókke eki eli jetpeı qaldy. Bul sát ulymnyń da, meniń de jadymda máńgi baqı saqtalyp qalady. Osy oraıda bizge osyndaı múmkindikti jasaǵan jáne Ystanbulǵa barýǵa kómek qolyn sozǵan ÝEFA basshylyǵy men atalǵan uıymnyń qoryna, Qazaqstan Ulttyq Paralımpıada komıtetiniń basshysy Qaırat Boranbaevqa, sondaı-aq «Meıirim» balalardy ońaltý ortalyǵyna erekshe alǵys aıtqym keledi.
Sondaı-aq ol ulynyń kýbokty jeńimpaz komandaǵa tapsyryp turǵan sátte óne-boıyn tolqynys sezimi bılep, kóz jasyna erik bergenin jetkizdi. «Bárińiz kórgendeı, ÝEFA prezıdenti Aleksandr Cheferın myrza Álıdiń qolyn alyp, kýbokty birge tapsyrǵanda kóz jasyma qalaı erik bergenimdi bilmeı qaldym. Tipti kamerany ustaı almadym, qoldarym dirildep turdy. О́ıtkeni bul úlken oqıǵa, ony barlyq adamdar, balalar, mıllıondaǵan adam kóredi. Ulymnyń aıaǵy joq bolsa da fýtbol oınaý, fýtboldy sonsha jaqsy kórip, armanyna umtylý úlken erlik ekenin túsinýimiz kerek. Ol erekshe balalar men adamdarǵa senimdilik uıalatyp otyrǵan meniń kishkentaı ǵana motıvatorym», deıdi Aqmaral.
«Lıverpýl» men «Chelsı» arasyndaǵy match aldynda Álı áıgili fýtbolshy Mohammed Salahpen birge jattyǵý jasap, estelik sýretke de túsken bolatyn. Sonymen qatar ol álemdik deńgeıdegi fýtbolshylarmen birinshi ret kezdesip turǵan joq.
11 jastaǵy balaqaı buǵan deıin argentınalyq fýtbol ańyzy Dıego Maradonna men Lıonel Messı, aýstralııalyq motıvator Nık Výıchıch, 2014 jylǵy «Altyn dop» ıegeri ýkraınalyq Andreı Shevchenko men Aleksandr Zınchenko sekildi fýtbolshylarmen birge dop tepken. Taǵy bir aıta keterligi, Álı byltyr ózi kýmır sanaıtyn brazılııalyq fýtbolshy Neımarmen kezdesý úshin Fransııanyń «Parı Sen-Jermen» klýbynyń jabyq jattyǵýyna da qatysýǵa múmkindik alǵan. Osylaısha Álı Turǵanbekov taǵdyrǵa moıymaı, tózimdilik pen tabandylyqtyń arqasynda alǵa qoıǵan maqsatyna jetip, álemdegi múmkindigi shekteýli jandardyń múmkindigi mol ekenin isimen dáleldep júrgen búgingi kúnniń batyry.
Aıta keteıik, «Lıverpýl» men «Chelsı» arasynda ótken matchtyń negizgi ýaqyty 2:2 esebimen teń aıaqtalyp, jeńimpaz komanda kezdesý sońyndaǵy penaltı serııasynda anyqtaldy. Bes penaltıdiń bárin sátti oryndaǵan «Lıverpýl» komandasy jeńimpaz atanyp, óz tarıhynda úshinshi márte (1977, 2001 jáne 2005) ÝEFA Sýperkýbogyn jeńip aldy. Al «Chelsı» komandasy ekinshi ret (2012 jáne 2013) Sýperkýbokta jeńildi.
