Aımaqtar • 19 Tamyz, 2019

Qobyzdyń quny

Ulttyq aspaptarymen qatar aǵashtan jasaǵan týyndylary joǵary baǵalanyp júrgen túrkistandyq sheber Dáýren Mınsharıpovti izdeıtinderdiń arasynda sheteldik týrıster de kóp. Týyndylaryn dúkenderge, saýda oryndaryna qoımaıtyn sheberdiń qolynan shyqqan dúnıeni izdegender sheberhanasynan tabady.

Ǵalymjan ELShIBAI

O.Tańsyqbaev atyndaǵy Almaty sándik-qoldanbaly óner kolledjinde músinshi mamandyǵyn alǵannan keıingi 15 jyl aǵash sheberi retinde eńbek etip júrgen Dáýrenniń tabysy jaqsy. Sheberdiń ańsary, ásirese qobyz jasaýǵa aýyp turady eken. Ár qobyzdy jasaýǵa keminde bir aı ýaqyt jumsaıdy. Odan durys ún shyqqanyn baqylaý úshin ózi qobyz tartýdy úırenip alǵan. Alǵashqyda týyndylaryn kórmege qoıyp, kórermenniń keıipine ene kópshiliktiń pikirin bilip júripti. Sóıtip aıtylǵan syn-eskertpelerdi saralaǵan. Búgingi tańda Taraz, Shymkent, Nur-Sultan, Almaty qalalarynda qobyzǵa suranys joǵary eken. Sheber mýzykalyq mektepte bilim alatyn shákirtterge qarapaıym aspapty 60 myń teńgege, otandyq jáne álemdik sahnada óner kórsetip júrgen talanttarǵa erekshe dızaınmen 1000 AQSh dollarynan joǵary baǵaǵa qobyz jasaıdy.

«Baǵany belgilegende aspaptyń kólemi men ketken materıalyn ǵana eseptesem, bazardaǵy satýshydan parqym qalmaıdy ǵoı. О́zim jumys barysynda qandaı kúıde bolǵanyma baılanysty baǵa belgileımin. Ulttyq aspap jasaýǵa asa náziktik pen sezimtaldyq, erekshe súıispenshilik qajet. Júıkege túsetin salmaq ta az bolmaıdy. Iаǵnı, qobyzdyń quny men úshin óte joǵary. Týyndylarymdy tutynýshyǵa amanattaımyn. Jasyratyny joq, kóp danamen taraıtyn jumystarymnyń qunyn tómenirek baǵalaımyn. Sebebi ol daǵdyly túrde jasalady», – deıdi sheber.

Ilgeride ótken ulttyq aspap jasaıtyn qolónershiler baıqaýyna sheber qylqobyz jáne narqobyz jasap qatysqan. Sahna tórinen narqobyzdyń úni estilgende, tyńdarmandar tańdanysyn jasyra almapty. Narqobyz sol baıqaýda jeńis syılaǵan. Sheberdiń aıtýynsha, narqobyzdy jasaýdan buryn qoljazbalardy qarap, aspapty uzaq ýaqyt zerttegen. Iаǵnı, bul jeńis uzaq izdenis pen tókken terdiń nátıjesi. Kompozısııalyq týyndylary arasynda sheberdiń kóńiline jaqyndary da az emes. Táýelsiz elimizdiń bolmysyn erkindiktiń aýqymyna syıdyrýǵa talpynys jasaǵan «Saıatkerlik» kompozısııasy ózi unatatyn eńbekteriniń biri. «Búrkitti qolyna qondyryp, kókti ańsaǵan saıatshy bala ár qazaqtyń aýylǵa degen saǵynyshyn arttyrady. Qazaq pen aýyl egiz uǵym ǵoı. Ulty qazaq azamattardan tys sheteldik týrıster eleń etip, halyqaralyq kórmelerde týyndynyń aldynda saǵattap turyp alady», – deıdi Dáýren Mınsharıpov.

Sheber óz týyndylaryna erekshe sapadaǵy aǵashty qoldanady. Arnaıy tapsyryspen basqa óńirlerden de aldyrady eken. Qaraǵash, úıeńki, jańǵaqty qoldanatyn sheber aǵashty arnaıy qoımada bir jyl saqtaıdy. Daıyn týyndysyn laktamaıdy, tabıǵı túsin saqtaý úshin as daıyndaǵanda qosatyn maıdy paıdalanady.

Túrkistan oblysy