Alǵashynda Vernyı qalasynyń Erler gımnazııasy ornalasqan ǵımarat 1930 jyly Jetisýdyń kópshilik kitaphanasyna berilip, alǵashqy dırektory Oraz Jandosov bolǵany belgili. Ǵımaratqa keıinnen 1971 jylǵa deıin Ulttyq kitaphana ornalasty. Al 1971 jyldan bergi aralyqtan kúni búginge deıin respýblıkalyq S.Begalın atyndaǵy balalar kitaphanasy retinde balalardyń rýhanııat mekemesi retinde qyzmet kórsetip keledi. Balalar kitaphanasynyń jetekshisi Alma Qonarovanyń aıtýynsha, kitaphana qorynda búginde bes júz myńǵa jýyq kitap bar. Munda kelýshiler ózderin qyzyqtyrǵan kitaptaryna tapsyrys bere alady.
Kitap qoryn tolyqtyrý Ortalyqtandyrylǵan kaitaphanalar júıesi arqyly júzege asady. Kitaphana jylyna 18 005 oqyrmandy qamtyp, 6 bólim, 20-dan astam úıirmeler men klýbtardy ulttyq rýhanııatty, qundylyqtardy dáripteý maqsatynda túrli sharalar ótkizilip turady. 160-tan astam merzimdik basylymdar túrin jazdyryp alady. Jylyna 700-den astam is-shara ótkizip, qala turǵyndaryn rýhanı azyqpen qamtamasyz etip otyrǵan kitaphanada Qazaqstan jazýshylarymen kezdesýler, kitaptardyń tanystyrylymy, ataýly, mereke kúnderine baılanysty is-sharalar ótedi.
Jylyna bir ret «Kitaphanadaǵy tún» is-sharasy ótkiziledi. Al aǵymdaǵy jyly qazan aıynda «Kitaphanadaǵy óner túnin» ótkizý josparlanyp otyr. Kitaphanada jylyna 4-5 márte sheteldik mamandardyń qatysýymen onlaın-kezdesýler uıymdastyrylyp turady. Kitaphana oqyrmandary halyqaralyq, respýblıkalyq, qalalyq baıqaýlardyń belsendi qatysýshylary. Taıaýda ótken «Ertegimen saıahat» halyqaralyq baıqaýynan Sultanáli Dúısenalıev I oryndy jeńip aldy. Osyndaı kishigirim jetistigi bar kitaphana mamandary balalardyń kitap oqýǵa yntasyn arttyryp, ónerge baýlyp, bilimdi urpaq tárbıeleýde aıanbaı eńbek etip keledi.
ALMATY
