О́negesi óristi festıvaldi Elbasy qory men Qorǵaljyn ekologııalyq observatorııasy mekemesi uıymdastyryp otyr. Baǵdarlamasy da keńinen qamtylǵan. Jastarǵa asa qajetti taqyryptar tóńireginde trenıngter, sheberlik klasstary, aksııalar, sport jarystary uıymdastyryldy. Máselen, «Mektepke jol» aksııasy. Elbasy qorynyń atynan 1500-den astam áleýmettik jaǵynan az qamtylǵan, sondaı-aq kópbalaly otbasylardyń jetkinshekterine mektepke qajetti qural-jabdyqtar tabys etildi.
Ejelgi dala tósin eljiretken tuńǵysh sharaǵa bir jarym myńǵa jýyq 10 men 25 jas aralyǵyndaǵy balalar men jasóspirimder jınaldy. Júz san qus mekendeıtin Qorǵaljynnyń kúmis kólderi shattyqtan tolqyp jatqandaı. Dala syryn, Otanymyzdyń qaıtalanbas dara syryn jas kókirekke qotaryp quıyp bergen halyqaralyq baıqaý-festıval Kenjebek Kúmisbekov atyndaǵy Qorǵaljyn aýdandyq mádenıet úıi kórkemónerpaz ujymynyń «Qus mekeni – Qorǵaljyn» taqyrybyndaǵy teatrlandyrylǵan kórinisimen ashyldy. Qus bazarynda ótken qyzyqqa bir qýanarlyǵy, jergilikti ónerpazdar úzbeı qatysty. Top jarǵandar da az emes. Máselen, hareografııa janry boıynsha óner kórsetken «Angels» úlgili zamanaýı bı ansambli birinshi oryndy ıelense, «Flamıngo» halyqtyq bı ansambli ekinshi oryndy enshiledi.
Jeńimpazdardyń gala konserti jastardyń oıyn-saýyq keshine ulasty. Kesh qonaqtary Dos, Toǵjan Muratova jáne «Qarapaıym» tobynyń ónerinen ádemi áser alǵan aýdan turǵyndary rýhanı azyqqa bir kenelip qaldy.
Aqmola oblysy
