Qazaqstan BUU-ǵa Iаdrolyq qarýǵa tyıym salý týraly shartty ratıfıkasııalaý qujatyn tapsyrdy

Álem • 30 Tamyz, 2019

Qazaqstan BUU-ǵa Iаdrolyq qarýǵa tyıym salý týraly qujatyn tapsyrdy

92 ret kórsetildi

Qazaqstan Iаdrolyq qarýǵa tyıym salý týraly shartty ratıfıkasııalaǵany jóninde resmı qujatyn Birikken Ulttar Uıymynyń Hatshylyǵyna tapsyrdy. Qujatty tapsyrý rásimi BUU qoǵamdastyǵynda onynshy ret atalyp otyrǵan Iаdrolyq synaqtarǵa qarsy is-qımyldardyń halyqaralyq kúnine oraılastyryldy. Bul týraly Syrtqy ister mınıstrliginiń baspasóz qyzmeti habarlady.

Egemen Qazaqstan

Is-sharaǵa BUU jáne 103 eldiń 500-den astam úkimettik emes uıymynyń koalısııasyn quraǵan «ICAN» ıadrolyq qarýǵa qarsy halyqaralyq qozǵalysynyń ókilderi qatysty. Olar Qazaqstanǵa ıadrolyq qarýsyzdaný isindegi beriktigi men kóshbasshylyǵy úshin alǵystaryn bildirdi.

Qujatty depozıtarııge tapsyra otyryp, Qazaqstan Respýblıkasynyń BUU janyndaǵy Turaqty ókili Qaırat Omarov bul oqıǵa Qazaqstannyń ıadrolyq qarýdan azat álem qurýdaǵy jahandyq kúsh-jigerlerge qosqan taǵy bir mańyzdy praktıkalyq úlesi ekenin atap ótti.

Osydan 70 jyl buryn keńestik atom bombasy alǵash ret synaqtan ótkizilgen el búginde ratıfıkasııalaý qujatyn tapsyrý arqyly 26-shy memleket bolyp ıadrolyq qarýǵa zańdy túrde tyıym salatyn alǵashqy tarıhı sharttyń kúshine ený perspektıvasyn jaqyndata tústi.

Sharttyń mátinin ázirleýge jáne onyń qabyldanýyna Qazaqstan belsendi túrde qatysyp kelgeni belgili. Qujattyń negizgi erejeleri álemdegi tórtinshi eń iri ıadrolyq arsenal ıesinen ıadrolyq qarýsyzdaný men taratpaý salasyndaǵy kóshbasshy memleketke aınalýdyń ónegeli jolyn kórsetken Qazaqstannyń qaǵıdatty ustanymyna jaýap beredi.

Qazaqstannyń ıadrolyq qarýǵa qarsy júrgizip jatqan kúsh-jigerleri eldiń Tuńǵysh Prezıdenti Nursultan Nazarbaevtyń 2045 jylǵa qaraı BUU-nyń 100 jyldyq mereıtoıyna deıin ıadrolyq qarýdan azat álemge qol jetkizý jónindegi bastamasyn basshylyqqa alýda. Iаdrolyq qarýǵa tyıym salý týraly sharttyń qabyldanýy bul qarý túrin joıý úshin kúres jolyndaǵy tarıhı mańyzdy kezeń bolmaq.

Sharttyń kúshine enýi úshin 50 memlekettiń ratıfıkasııasy qajet. Osy oraıda qazaqstandyq ókildik basshysy: «Eger Bolıvııa qajetti ratıfıkasııalar sanynyń birinshi jartysyna 6 tamyz kúni - Hırosımany bombalaý kúni jetkizse, Qazaqstan ekinshi jartysynyń tusaýyn Halyqaralyq ıadrolyq synaqtarǵa qarsy kúnine oraılastyryp ashyp otyr. Osylaısha, elimiz búkil adamzattyń qaýipsiz bolashaǵyn oılaýshylardy osyndaı áreketterge barýǵa shabyttandyra túspek» dep málimdedi.

Rásim barysynda qatysýshylar barlyq ıadrolyq synaqtardyń qurbandaryn bir mınýt únsizdikpen eske aldy.

«Bizdiń áreketimiz, sonymen qatar, ıadrolyq qarýdy qoldaný saldarynan zardap shekkenderdiń barlyǵyna degen qurmetimiz. Ortaq mindetimiz - osyndaı qaıǵyly jaǵdaılardyń qaıtalanýyn boldyrmaý» dep atap ótti Q.Omarov.

Aıta keteıik, Iаdrolyq qarýǵa tyıym salý týraly shart 2017 jylǵy 7 shildede BUU-nyń 122 múshe-memleketiniń qoldaýymen qabyldandy. Bul qujat 2017 jyldyń naýryz jáne maýsym-shilde aralyǵynda Nıý-Iork qalasynda ótken Iаdrolyq qarýdyń túbegeıli joıylýyna ákeletin ıadrolyq qarýǵa tyıym salý týraly zańdyq mindetteýshi kúshi bar qujat ázirleý boıynsha BUU konferensııasynyń eki sessııasynyń qorytyndysy boldy.

Konferensııa BUU-ǵa barlyq memleketter qatysýy úshin ashyq túrde ótkizildi. Alaıda, de-ıýre jáne de-fakto ıadrolyq qarýy bar toǵyz memleket jáne olardyń odaqtastary atalǵan kelissózderge qatysýdan ádeıi bas tartty.

Iаdrolyq qarýǵa tyıym salý týraly shartqa qol qoıý úshin Nıý-Iork qalasynda 2017 jylǵy 20 qyrkúıekte BUU Bas Assambleıasynyń 72-sessııasy aıasynda ashyldy jáne 50-shi ratıfıkasııalaý gramotasy saqtaýǵa tapsyrylǵannan bastap 90 kúnnen keıin kúshine enedi.

Búgingi tańda 70 memleket Shartqa qol qoıyp, onyń 26-sy osy qujatty ratıfıkasııalaǵan.

Qazaqstan bul qujatqa 57-shi memleket retinde 2018 jylǵy 2 naýryzda qol qoıdy, al 2019 jylǵy 29 tamyzda ony ratıfıkasııalaǵany jóninde resmı qujatyn 26-shy memleket bolyp tapsyrdy.