Qoryqshy Erlan Nurǵalıevtiń ólimi: Is prokýratýraǵa qaıtaryldy

Qazaqstan • 30 Tamyz, 2019

Qoryqshy Erlan Nurǵalıevtiń ólimi: Is prokýratýraǵa qaıtaryldy

71 ret kórsetildi

Zardap shegýshilerdiń ókilderi men sottalýshylardyń qorǵaýshylary «Ohotzooprom» ınspektory Erlan Nurǵalıevtiń ólimi boıynsha isti prokýratýraǵa qaıtarýdy surady. Sebebi, eki tarap ta sotqa deıingi tergeýdiń sapasyna kóńilderi tolmaǵan. Sýdıa osy isti prokýrorǵa qaıtarý týraly úkim shyǵardy dep habarlaıdy QazAqparat tilshisi.

Egemen Qazaqstan

B.Musabekov, B.Qaıyrbekov, J.Myrzabaev, A.Ákimov, B.Ahmetov, N.Shúkildikov, K.Aqshanovqa qatysty qylmystyq is basty sot talqylaýyn taǵaıyndaýǵa kedergi keltiretin qylmystyq is júrgizý zańnamasynyń eleýli buzýshylyqtarynyń anyqtalýyna baılanysty prokýrorǵa aldyn ala tyńdaý satysynan qaıtaryldy. Sáıkes úkimdi Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń sýdıasy Bekzat Shalǵymbaev shyǵardy.

Aldyn ala tyńdaý barysynda jábirlenýshilerdiń ókili P.Nısık pen N.Nurǵalıeva - advokat Almas Qasqyrbaı qylmystyq isti prokýrorǵa qaıtarý týraly ótinish bildirip, sotqa deıingi tergeý barysynda sottalýshylar B.Bazarov, B.Kaıyrbekov, J.Myrzabaev, A.Ákimovtiń áreketterinde asa aýyr qylmysty jasyrý jáne asa aýyr qylmys týraly habarlamaý týraly prosessýaldyq sheshim qabyldanbaǵan, bul faktiler tekserilmegen. Sonymen qatar sottalýshy K.Aqshanovtyń qorǵaýshysy tergeý organynyń aıyptaý aktisinde qylmys ornynyń tolyq málimetterin kórsetpegenin jáne zańsyz ań aýlaý saldarynan keltirilgen zalaldyń mólsherimen kelispeıtinin aıtyp, qylmystyq isti prokýrorǵa qaıtarý týraly ótinish bildirdi.

Bir top adam qasaqana adam óltirdi dep aıyptalǵan sottalýshylardyń qorǵaýshylary qylmystyq bapty qaıta kvalıfıkasııalaýdy talap etýde. Olardyń pikirinshe, kúdiktiler adam ólimine ákep soqtyrǵan asa aýyr túrde densaýlyqqa zııan keltirgen. Sebebi, qoryqshy Erlan Nurǵalıev oqıǵa ornynda qaza tappaǵan, aýrýhanaǵa jetkizgende tiri bolǵan. Sondaı-aq advokattar polıseılerdiń ańshylardyń kıikti atqandaryn dáleldeı almaǵanyn aıtty. Alaıda, «Ohotzooprom» ınspektorlary daladan zańmen qorǵalatyn atylǵan 17 janýardy taýyp, olardyń zalalyn 45 mln teńge dep eseptedi. Biraq, qorǵaýshylardyń pikirinshe, bul soma asyra siltelgen, zalaldyń shyn mánindegi somasy 17 mln teńgeden sál asady.

Sottalýshy Qaırat Aqshanovtyń qorǵaýshysynyń ótinishin Berik Ahmetov pen Nurlan Shúkildikovtyń advokattary qoldap otyr. Budan bólek, sot aldyn ala tyńdalym barysynda basqa da zań buzýshylyqtardy anyqtady, atap aıtqanda, aıyptaýda qarama-qaıshylyqtar anyqtaldy, zardap shegýshilerge qaı jerde jáne qaı orynda dene jaraqattary jasalǵany kórsetilmegen, kúdiktilerdiń áreketterin saralaý týraly sheshimde qylmystardyń obektıvti jaǵy sıpattalmaǵan. Sondaı-aq atalǵan qylmystyq is boıynsha sot óndirisiniń tili qazaq tili dep tańdalǵan, alaıda, qujattardyń bir bóligi zardap shegýshi Petr Nısyk úshin orys tiline aýdarylmaǵan. «Aldyn ala tyńdalym barysynda anyqtalǵan osy buzýshylyqtardyń barlyǵy basty sot talqylaýyn taǵaıyndaýǵa kedergi keltirip otyr. Sondyqtan sot qylmystyq isti prokýrorǵa qaıtarý týraly sheshim shyǵardy», - dep habarlady oblystyq sottyń baspasóz qyzmeti.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz