Jalyn 29 tamyz kúni tús ýaqytynda shyqqan. Ony aýyzdyqtaýǵa órt sóndirý poıyzy, 7 arnaıy tehnıka jáne 64 órt sóndirýshi jumyldyryldy.
«Negizgi kúsh turǵyn úılerdi, temirjol qatynas joldaryn, «Jańa aýyl» stansasynyń jáne «Metallýrgıcheskaıa» qosalqy stansasynyń nysandaryn saqtap qalýǵa jumsaldy. О́rt sóndirýshilerdiń kásibıliginiń arqasynda bul mańyzdy nysandarǵa qaýip tóngen joq», - dedi Tótenshe jaǵdaılar basqarmasynan.
40 ga aýmaqta sharýashylyq qoqystary men aǵash sharbaqtar, sondaı-aq saıajaı qoǵamyna jaqyn jerde qurǵaq shóp órtendi. Tilsiz jaý barlyǵy 160 ga aýmaqty jaılady. О́rt 20.25-te sóndirildi. Oqıǵa ornynan Temirtaý qalasynyń Ortalyq aýrýhanasyna 1932 jyly týǵan azamatsha jetkizildi.
Tótenshe jaǵdaılar basqarmasynyń málimetinshe, aldyn ala aqparatqa sáıkes, ıeleri bar - 20 jáne ıen jatqan 700-den astam saıajaı úıi jermen jeksen boldy.
