Match bastalardan bir saǵat buryn eki komandanyń quramy qolymyzǵa tıgende qandaı da bir ózgeris bar-joǵyn bilý úshin birden ótken oıynmen salystyrdyq. Sóıtsek eki komandanyń da bas bapkerleri negizgi quramǵa azdaǵan ózgeris jasaǵan eken. Elordada ótken matchta birinshi mınýttan bastap alańǵa shyqqan Fırmın Mýbeleniń ornyna negizgi quramda Roman Mýrtazaev shyqty. Al BATE sapynan Erven Mýkam men Slobodan Sımovıchtiń ornyna Borıs Kopıtovıch pen Anton Saroka alǵashqy mınýttan jasyl alańda óner kórsetti.
Kezdesýdiń alǵashqy bes mınýty teń dárejede bastalǵanymen, altynshy mınýtta alań ıeleri jyldam gol soǵýǵa múmkindik aldy. Gol avtory – Maksım Skavysh. Jankúıerlerdiń qyzý qoldaýyna ıe bolǵan BATE fýtbolshylary alǵa qaraı lap qoıdy. Degenmen «Astana» oıynshylary jyldam ózderine kelip, úsh mınýtta eki birdeı qaýipti shabýyl uıymdastyryp úlgerdi. Biraq eshqaısysy nátıje bergen joq. Sondaı-aq jerlesterimiz alǵashqy 15 mınýt ishinde BATE qaqpasyna eki birdeı buryshtama dobyn oryndaǵanymen, qarsylas komandanyń qorǵaýshylary qyraǵylyq tanytyp, dopty óz aıyp alańynan alyp shyǵa bildi. Ári qaraı oıyn eki komandanyń alma-kezek shabýylymen órbidi. Kezdesýdiń 21-mınýtynda Marın Tomasov BATE-niń eki birdeı qorǵaýshysyn ońaı aldap ótip, qaqpaǵa baǵyttaǵan soqqysy qıys ketse, 35-mınýtta alań ıeleri oıynshysynyń alystan shirene tepken doby Erıch qorǵaǵan qaqpanyń dál janynan ótti. Arada bir mınýt óter-ótpesten «Astana» qorǵaýshysy Lýka Shımýnovıch óz aıyp alańynda qatelesip, qarsylas oıynshysynyń soqqy jasaýyna múmkindik berip qoıdy. Alaıda Erıch óz ornynan tabyla bildi. Birinshi taımnyń sońǵy mınýttarynda BATE fýtbolshylary bizdiń qaqpamyzdyń aldyn torýyldap, úziliske deıin ekinshi golyn soǵýǵa umtyldy. Abyroı bolǵanda qorǵaýshylarymyz sátti qorǵanyp, qaýiptiń betin qaıtardy.
Alǵashqy taım BATE-niń azdaǵan basymdyǵymen ótkenimen, «Astanany» nashar oınady dep aıta almaımyz. Dorın Rotarıý men Marın Tomasov qos qaptaldan qarsylastardy qyspaqqa alyp, qaýipti shabýyl uıymdastyrdy. Sondaı-aq Erıchtiń qyraǵylyǵyn da aıta ketken jón. Úsh birdeı gol soǵatyn 100 paıyzdyq shabýyldyń betin qaıtaryp, qaqpasyn goldan aman saqtap qaldy. Osylaısha, kezdesýdiń alǵashqy taımy 0:1 esebimen BATE-niń paıdasyna aıaqtaldy.
Kezdesýdiń ekinshi bóligin BATE fýtbolshylary belsendi bastap, á degennen-aq shabýylǵa kiristi. Degenmen «Astana» oıynshylary da qarap qalǵan joq. Qarsylastyń árbir shabýylyna shabýylmen, soqqysyna soqqymen jaýap berip otyrdy.
Matchtaǵy qyzyq jaǵdaı oıynnyń 52-mınýtynda oryn aldy. Stadıonǵa jınalǵan 20 myńǵa jýyq jankúıer bir mezette ornynan turyp, 2-3 mınýt boıy shapalaq soqty. Munyń syryn belorýssııalyq áriptesterimizden suraǵanda, BATE-niń 1996-2018 jylǵy basshysy Anatolıı Kapskıı byltyr 52 jasynda qaıtys bolǵan eken. Osylaısha, jankúıerler oıynnyń 52-mınýtynda Kapskııdi eske alyp, rýhyna taǵzym bildirdi.
Matchtyń 55-mınýtynan bastap alań ıeleri oıyndy tolyq óz baqylaýlaryna aldy. Bizdiń oıynshylar qorǵanysqa mán berip, tek qarsy shabýylǵa ıek artýǵa májbúr boldy. Bálkim, úziliste Grıgorchýk fýtbolshylarǵa qorǵanysty myqtap ustaýǵa tapsyrma bergen bolar. О́ıtkeni «Astanaǵa» gol soqqannan góri, qaqpaǵa gol ótkizip almaý mańyzdy edi.
Dúrkin-dúrkin shabýyldyń óz jemisin berer sáti bolady ǵoı. 65-mınýtta sondaı sátterdiń birinde alǵashqy goldyń avtory Maksım Skavysh qaqpamyzǵa ekinshi golyn soqqan bolatyn. Abyroı bolǵanda qaptaldaǵy tóreshi jalaýshasyn kóterip, dop oıynnan tys jaǵdaıda soǵylǵanyn bildirdi. Esep ózgerýsiz qaldy. Kezdesýdiń 70-mınýtynda Roman Grıgorchýk oıyndaǵy alǵashqy ózgeristi jasady. Alańda shabýylshy qyzmetin atqarǵan Roman Murtazaevtyń ornyna Rangelo Iаngany shyǵardy. Match aldyndaǵy baspasóz jıynynda gol soǵýǵa tyrysamyn degen shabýylshy alǵashqy múmkindiginde múlt ketti. Tipti, dop toqtatýda qatelesip, dopty qarsylas komanda oıynshysynyń aıaǵyna salyp berdi.
Qatelikti keshirmeıtin BATE oıynshylary matchtyń 85-mınýtynda «Astana» qaqpasyna ekinshi golyn soqty. Bul joly mergendigimen Evgenıı Iаblonskıı kózge tústi. Jankúıerlerdiń qyzý qoldaýyna ıe bolyp, goldan rýhtanǵan alań ıeleri «Astana» qaqpasyna shabýyldy bir sátke de toqtatqan joq. Qaqpamyzǵa ekinshi gol soǵylǵannan keıin Grıgorchýk alańǵa eki birdeı qorǵaýshyny shyǵardy. Jarko Tomashevıch pen Abzal Beısebekov komandanyń qorǵanysyn qymtap tastady. Fýtbolshylar qaqpamyzǵa gol ótkizbeı, áreń degende tablodaǵy kórsetkishti saqtap qaldy. Osylaısha «Astana» syrt alańda jeńilse de, toptyq kezeńge joldama aldy.
Juma kúni Monakoda Eýropa lıgasynyń 2019-2020 jylǵy toptyq kezeńiniń jerebe tartý rásimi ótti. Jerebe qorytyndysy boıynsha Qazaqstannyń bes dúrkin chempıony aǵylshynnyń azýly «Manchester Iýnaıted», Serbııanyń «Partızan» jáne Gollandııanyń «Alkmaar» komandalarymen bir topqa tústi. «Astana» L tobyndaǵy alǵashqy oıynyn syrt alańda «Manchester Iýnaıtedke» qarsy ótkizetin boldy.
«Astana» klýbynyń bas bapkeri Roman Grıgorchýk pen komanda kapıtany Nenad Erıch Eýropa lıgasynyń jerebesi týraly pikir bildirdi. «Men jerebege salmaqty qaraımyn, óıtkeni ony eshkim ózgerte almaıdy. Bul topty óte qyzyqty dep sıpattaýǵa bolady. Árıne, alda «Manchester Iýnaıtedpen» qyzyqty oıyn kútip tur. «Old Traffordta» bolyp, olarmen bir alańda oınaýdyń ózi barlyǵymyz úshin úlken oqıǵa. Sol sebepti óte qyzyq bolady», deıdi Roman Grıgorchýk.
Al Nenad Erıch «Partızanǵa» qarsy ótetin oıyn ózi úshin qyzyqty bolatynyn aıtady. «О́te qyzyqty topqa tap boldyq. Úsh qarsylasymyz da ornalasqan sebetterine qaramastan TOP komanda bolyp esepteledi. «Manchester Iýnaıtedti» tanystyrýdyń ózi artyq. «Partızan» Serbııa chempıonatyndaǵy eki úzdik komandanyń biri. Serbııada týyp-ósken men úshin Belgrad komandasyna qarsy oınaý qyzyqty bolmaq. Toptaǵy sońǵy qarsylasymyz – «Alkmaar» Eýropadaǵy eń myqty chempıonattardyń biri retinde sanalatyn Nıderlandııanyń úzdik komandasy. Sondyqtan Eýrododanyń kúzgi maýsymynda bizdi tartysty ári qyzyqty oıyn kútýde. Biz óz kezegimizde jaqsy nátıje úshin oınap, ózimizdiń joǵary deńgeıdegi oıynymyzdy kórsetemiz degim keledi».
Aıta keteıik, elorda komandasy atalǵan komandalarmen Eýrododa oıyndarynda birinshi ret kezdeskeli tur.
Álı BITО́RE,
«Egemen Qazaqstan» – Borısovten (Belarýs)
