Satylap iske asyrylǵanda utymdy bolmaq

Qasym-Jomart Toqaevtyń Joldaýy­nyń mazmunyna aqparattyq keńistikti tal­daý negiz bolǵandaı. Iаǵnı, buqaralyq aqparat quraldarynda kóterilgen prob­lemalardyń birqatary kórinis tapty dep oılaımyn. Prezıdent sol problemalarǵa Joldaý aıasynda jaýap berdi.

Zeınetaqy júıesine, ekonomıkalyq ósimge, saıası jańǵyrýǵa jáne basqa­laryna qatysty mańyzdy máselelerdiń barlyǵy qamtyldy. Máselen, 5 paıyz kólemindegi qosymsha zeınetaqy tólemi taqyryby qoǵamda qyzý talqylanǵany belgili. Q.Toqaevtyń Joldaýynda ony tóleıtin kásipkerler tarapynyń da, halyqtyń da múddesi eskerildi. Eki tarap ta óz­derine qajetti jaýap al­dy. Áleýmettik tólem­derge qatysty tur­ǵyndardy alańdatqan jaıttar, agro­ónerkásip keshenindegi problemalar, memqyzmettiń tıimdiligi syndy máselelerdiń barlyǵy jaýapsyz qalǵan joq.

Men saıası júıeni damytýdy atap ótkim keledi. Prezıdent ekonomıkany damytýdy saıası júıeni jańǵyrtýdan bólek júrgizý múmkin emestigine erekshe toqtaldy. Parlament mindetti túrde kóppartııaly bolý kerek degen pikirdi qoldaıtynyn bildirdi. Mıtıng týraly zańnamany jetildirý, azamattardyń óz oıyn erkin bildirýine múmkindik berý, balama syndarly saıası kózqarastardyń bolýy syndy máselelerdiń aıtylǵany óte durys boldy dep esepteımin.

Qazirgi tańda bılik tym aýqymdy dúnıelerden buryn, turǵyndardyń qajettiligine jedel nazar aýdarýǵa basymdyq beretini baıqaldy. Basym­dyqtar aıqyndaldy, endigi másele – Pre­zıdent kótergen bastamalardy, júktegen mindetterdi júzege asyrý. Menińshe, bılik organdaryndaǵy biraz sheneýniktiń jumys stılin ózgertýine, jaǵdaıǵa beıim­delýine týra keledi. Árıne bul elimizdegi ahýaldyń jaqsy jaǵyna ózgerýine áser etedi.

Prezıdent Joldaýy óte aýqymdy, kóptegen máseleni qamtyǵan aýqymdy qujat. Memleket basshysy aıtqan tapsyr­malardyń, qolǵa alynatyn jumystardyń árqaısysyn júzege asyrýǵa ýaqyt kerek. Aıtalyq, mıtıngke ruqsat berýge qatysty jumystar birneshe aptada sheshilýi múmkin. Al zeınetaqy júıesin ońtaı­lan­dyrýǵa odan kóbirek, bálkim jarty jyldaı ýaqyt kerek bolar. Mem­lekettik qyzmet salasy, ákimderdiń reıtıng­terin anyqtaý, jumystaryn baǵalaý syndy jumystardy júzege asyrýǵa bir­neshe jyl ketýi múmkin. Árıne men bar­lyǵyn shartty túrde aıtyp otyr­myn. Qalaı bolǵanda da, Joldaý maz­munyn­daǵy máseleler satylap iske asy­rylatyn bolady.

Ǵazız ÁBIShEV,
saıasattanýshy