Kónekóz qarııalardyń aıtýyna qaraǵanda, Ahmet kópes osy daladaǵy aqshamen saýda jasaǵan az ǵana adamnyń biri bolsa kerek. Myńdy aıdaǵan baı, onyń ústine at tuıaǵy jetetin jermen alys-beris jasap, peshenesine jazylǵan baılyqty jınaǵan eken. Kúnderdiń bir kúninde Ahmet baı uıqysynan turmaı qalady. Halin bile kelgen et jaqyn aǵaıyn-týys tamyry soqpaı jatqan soń dám-tuzy taýsyldy dep sheshedi. Endigisi ne turys, qara jerdiń qoınaýyna, jer besikke tapsyrý kerek. Sharapatyn kórgen talaı jaqsy men jaısań «oıbaýyrymdap», at qoıyp kelip, janazasyn shyǵaryp, jerlegen. Arada bir-eki kún ótken soń qabir basynan estigen jannyń jon arqasyn shymyrlatatyn azaly ún shyǵady. Júrek jutqan jigitter qabirdi ashyp qarasa, baı tiri eken. Biraq keıingi jurt shaıtan tiriltip tur dep sheshedi. Qalaı bolǵanda da aq ajaldyń kelgeni anyq.
Sóıtip, Torǵaı dalasyndaǵy eń yqpaldy, bedeldi adamnyń eki tirilip, bir ólgeni anyq. Baıdyń básine saı mazar salynady. Mazardyń qabyrǵalary ılengen balshyq kirpishtermen kóterilip, kúmbezdeledi. Kólemi ájeptáýir, uzyndyǵy jeti metrge jýyq, al bıiktigi de sol shamada. Uzaq ýaqyt ótkendikten be, qabiriniń ústi men edenniń astyndaǵy kirpishteri tozǵan. Mazardyń aldyńǵy betinde arabsha jazylǵan jazý bertinge deıin saqtalǵan.
Ahmet baıdyń urpaqtary Jarqaıyń aýdanynda tirshilik etip jatyr. 2003 jyly L.N.Gýmılev atyndaǵy Eýrazııa ulttyq ýnıversıtetiniń arheologııalyq ekspedısııasy arnaıy zerttep, Qyzyl tam kesenesi XVIII ǵasyrda salynǵandyǵyn anyqtaǵan bolatyn. Ári olar bul keseneni óńirdegi eń kóne qurylystyń biri dep paıymdap otyr.
Jalpaq daladaǵy kóz janary jeter jerden kóńil arbaıtyn kóne beıit bul jerde kimderdiń ómir súrgendigin, meken etkendigin meńzeıtindeı.
Aqmola oblysy,
Jarqaıyń aýdany
