Bıznes ahýaldy jaqsartý boıynsha atqarylyp jatqan jumys týraly Ulttyq ekonomıka mınıstri R. Dálenov, qurylysqa ruqsat alý jáne kóliktik-logıstıkalyq ınfraqurylymdy damytý tártibin jeńildetý týraly Indýstrııa jáne ınfraqurylymdyq damý mınıstri R. Sklıar, bilim berý salasyndaǵy halyqaralyq kórsetkishterdi jaqsartý týraly Bilim jáne ǵylym mınıstri A. Aımaǵambetov, saýdadaǵy ındıkatorlardy arttyrý sharalary týraly Saýda jáne ıntegrasııa vıse-mınıstri A. Asqaruly baıandady.
Osy jylǵy sáýir aıynda Parlament jetinshi zańnamalyq túzetýlerdi qabyldady. Bul túzetýlerde qurylys salasynda «bir tereze» qaǵıdatyn engizý, kelisim-sharttardy oryndaý máselesin ońtaılandyrý, salyq salý salasynda reformalardy iske asyrý sharalary bar. Kásipkerler arasynda túsindirý boıynsha úlken jumys atqaryldy.
«Qazirgi kezde Qazaqstan bıznes júrgizý jeńildigi boıynsha reıtıngte álemniń 190 eli arasynda 28-orynda. Jalpy, bul reıtıng bıznesti júrgizý sharttaryn jeńildetýge baǵyttalǵan reformalardyń qanshalyqty tıimdi ekenin kórsetedi. Bul, árıne, elimizdiń ınvestısııalyq tartymdylyǵyna yqpal etedi jáne jańa jobalar men óndiristerdi qurýǵa qatysty múmkindikterdi bilýge jol ashady», dedi A. Mamın.
Úkimet basshysy Dúnıejúzilik banktiń elimizdiń qalalary men óńirlerinde bıznesti júrgizý jeńildigi reıtınginiń qorytyndysy boıynsha Almaty qalasy men Mańǵystaý jáne Aqtóbe oblystary ákimderi (tıisinshe 1, 2 jáne 3-oryndar) tıimdi jumys jasaǵanyn atap ótti.
«Biz energetıka, temir jol kóligi, AKT salalarynda jaqsy kórsetkishterge qol jetkizdik. Sonymen qatar halyqaralyq saýda, densaýlyq saqtaý jáne qarjy sektoryndaǵy kórsetkishterdi jaqsartý boıynsha jumysty kúsheıtý qajet», dedi Premer-Mınıstr.
Úkimet basshysy Ulttyq ekonomıka mınıstrligine múddeli memlekettik organdarmen birlesip, aǵymdaǵy jyldyń qazan aıynyń sońyna deıin bıznesti júrgizý sharttaryn jaqsartý boıynsha segizinshi túzetýler toptamasyn Úkimetke usynýdy tapsyrdy. Bul toptama kásiporyndardy ashý jáne menshikti tirkeý, qurylysqa ruqsat alý jáne elektrmen jabdyqtaý júıelerine qosý kezinde ınvestorlar úshin mańyzdy bıznes-prosesterdi jeńildetý reformalaryn kózdeıdi.
Asqar Mamın, sondaı-aq Qazaqstannyń halyqaralyq reıtıngterdegi pozısııasyn odan ári jaqsartý úshin bir aı merzimde qolda bar is-sharalar josparlaryn ózektendirip, jańa is-sharalar josparyn qabyldaýdy, sondaı-aq baǵdarlamalyq qujattarda osy reıtıngterde Qazaqstannyń ustanymyn jaqsartý jónindegi nysanaly ındıkatorlardy bekitý máselesin pysyqtaýdy tapsyrdy.
«Qalalar men oblystardyń ákimderi júrgizilip jatqan reformalardy iske asyrý jáne bıznes júrgizýge, ınvestısııalar tartýǵa qolaıly jaǵdaılar jasaý, ınfraqurylymdy damytý boıynsha jumysty kúsheıtýi qajet», dedi Premer-Mınıstr.
Úkimet basshysy Qazaqstannyń halyqaralyq reıtıngterdegi orny máselesi Úkimettiń Jobalyq keńsesiniń turaqty baqylaýynda bolatynyn atap ótti.
