Qazaqstan Prezıdentine oblystyń áleýmettik-ekonomıkalyq damýynyń negizgi kórsetkishteri men agroónerkásip kesheniniń keleshegi týraly málimet berildi. Sondaı-aq Qasym-Jomart Toqaevqa dándi jáne maıly daqyldardyń jańa suryptary kórsetildi.
Memleket basshysy mehanızatorlarmen áńgimeleskende aýyl sharýashylyǵy alqaptaryn tıimdi paıdala-
nýdyń mańyzdylyǵyn atap ótip, memleket tarapynan agroónerkásip keshenin órkendetýge basa mán berilip otyrǵanyn aıtty.
– Memleketimiz úshin sizderdiń eńbekterińizdiń máni zor. Úkimet fermerlerge jan-jaqty qoldaý kórsetedi, aýyldyń ómir súrý sapasyn arttyrý jóninde sharalar qabyldaıtyn bolady, – dedi Prezıdent.
Kezdesý sońynda Qasym-Jomart Toqaev dıqandarǵa aýa raıynyń jaqsy jáne ónimniń mol bolýyn tiledi.
Memleket basshysy budan keıin Jaqsy aýylyndaǵy T.Ýálıev atyndaǵy sport mektebin aralap kórdi.Qazaqstan Prezıdentine kúres, boks jáne fýtbol sportyna arnalǵan zaldar kórsetildi. Qazirgi ýaqytta Jaqsy aýdanynyń 170 oqýshysy boks, grek-rım kúresi jáne fýtbol seksııalarynda sportpen shuǵyldanady.
Bul sport mektebi óz tarıhynda 4800 sportshyny, sonyń ishinde Qazaqstan Respýblıkasynyń eńbek sińirgen jáne halyqaralyq dárejedegi sport sheberlerin daıyndap shyǵardy. Memleket basshysy grek-rım kúresinen Olımpıada chempıony Iýrıı Melnıchenkomen jáne sport mektebiniń tárbıelenýshilerimen áńgimelesý barysynda aýyldaǵy buqaralyq sportty damytýdyń mańyzdylyǵyn atap ótti.
Memleket basshysy sondaı-aq «Ýrojaı» JShS-niń agroónerkásip kesheninde boldy.
Qasym-Jomart Toqaevqa kompanııanyń qyzmeti, dıirmen kesheniniń, elevatordyń, kombıkorm zaýytynyń jáne nan-toqash ónimderin shyǵarý jónindegi óndiris nysandarynyń jumysy týraly málimet berildi.
Qazaqstan Prezıdentine agrokásiporynda qýaty jóninen jylyna 12 myń tonna túrli jarmalar men jyldam daıyndalatyn suly qaýyzdaryn óndirýdiń jańa tehnologııalyq úderisi, sondaı-aq daıyn ónimniń úlgileri kórsetildi.
Memleket basshysy agrarshylardyń nazaryn memleket bólgen aýyl sharýashylyǵy sýbsıdııalaryn tıimdi paıdalaný qajettigine aýdardy.
