Almatyda qaıratker jýrnalıst Kákimjan Qazybaevqa arnalǵan respýblıkalyq májilis ótti

Rýhanııat • 21 Qyrkúıek, 2019

Almatyda qaıratker jýrnalıst Kákimjan Qazybaevqa arnalǵan respýblıkalyq májilis ótti

183 ret kórsetildi

Jýrnalıst-jazýshy, memleket jəne qoǵam qaıratkeri Kəkimjan Qazybaevtyń týǵanyna bıyl 90 jyl toldy. Osyǵan oraı búgin qara shańyraq ál-Farabı atyndaǵy Qazaq Ulttyq Ýnıversıtetinde «Kákimjan Qazybaev – qaıratker, qalamger, azamat» atty respýblıkalyq ǵylymı-praktıkalyq konferensııa ótti.

Aınash ESALY

Alpysynda arǵy dúnıege attanǵan arda uldyń eli úshin jasaǵan eńbegi eren. Bılik qyzmette júrgende de qylyshynan qan tamǵan keńestik saıasattyń qaharynan ımenip qalǵan joq, kerisinshe halyqtyń qamyn oılap, paıdaly isterge bilek sybana kiristi. Kákimjan Qazybaevtyń adamgershiligi, kóregendigi, jazýshylyq qyry, qaıratkerligi, shyǵarmashylyǵy men ustazdyq taǵylymy jaıly zamandastary men ómirin zertteýshiler burynnan aıtyp, jazyp keledi. Búgin ótken ǵylymı konferensııa kezinde de ómiri úlgi bolar tulǵanyń bir kelbeti ashylǵandaı boldy.

Ǵylymı sharaǵa memleket jáne qoǵam qaıratkerleri, aqyn-jazýshylar, jýrnalıster men shákirtteri qatysty. Tulǵa beınesin tanyta túsken is-sharany qara shańyraq QazUÝ-dyń rektory Ǵalymqaıyr Mutanovtyń ózi júrgizdi. Alǵysózin alǵyspen bastap, keıingi sózin QR Prezıdenti Qasym-Jomart Toqaevtyń arnaıy jedelhatyna bóldi. Memleket basshysy ónegeli ómiri óskeleń urpaqqa úlgi bolǵan Kákimjan Qazybaevtyń otbasyna amandyq, baq-bereke tiledi.

Ǵylymı-praktıkalyq konferensııa barysynda Kákimjan Qazybaevtyń ómiri men shyǵarmashylyǵyna arnalǵan fılm jurt nazaryna usynyldy. Al aqyn, QR UǴA múshe-korrespondenti Baýyrjan Jaqyp «Kákimjan Qazybaevtyń jazýshylyq qyry» taqyrybynda baıandama oqyp, shyǵarmashylyq jolyndaǵy jetistikteri men tyńnan túren salǵan taqyryptaryna keńinen toqtaldy.

Qoǵam jáne memleket qaıratkeri, akademık Kópjasar Náribaıuly Náribaev Kákimjan Qazybaevtyń qaıratkerligi jaıly tolǵandy. Jazýshy, telejýrnalıst Sultan Orazáli bolsa tulǵanyń tórt erligin tizip shyqty. Onyń ishinde halyq jaýynyń qyzy bolǵan Orynsha Qarabalına-Qazybaevany ómirlik jar etip tańdaýynyń ózi mahabbat jolyndaǵy kózsiz erliktiń biri. Al Raqymjan Qoshqarbaevty nasıhattaý men tanytý jolyndaǵy erligi – bir tóbe.

Jýrnalıst, jazýshy Janbolat Aýypbaev Kákimjan Qazybaevtyń shyǵarmashylyǵy, izdenis joly, bergen tárbıesi men jýrnalıstik sabaqtastyq jaıly sóz qozǵady. QR UǴA akademıgi, Qazaqstannyń eńbek sińirgen qaıratkeri Tóregeldi Sharmanov tulǵanyń azamattyǵy jaıly aıryqsha aıta ketti.

Aıtýly sharaǵa QR UǴA-nyń korrespendent-músheci, «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli, general-leıtenant Ádil Shaıahmetov qatysty.

Ǵylymı-praktıkalyq konferensııa sońynda Kákimjan Qazybaevtyń jubaıy Orynsha Qarabalına-Qazybaeva sóz alyp, ulttyń qamyn oılaǵan tulǵanyń ómir joly, qyzmettegi hıkaıalary jaıly syr tarqatty. Barsha qatysýshylar men qara shańyraq QazUÝ ujymyna alǵysyn bildirdi. Ultyn súıgen tulǵanyń uly, Alash Media Group medıaholdınginiń bas dırektory Batyr Qazybaev ákesimen zamandas bolǵan tulǵalardyń erligine toqtalyp, erekshe iltıpatyn jetkizdi. Sondaı-aq, shara barysynda Kákimjan Qazybaevtyń ómir jolyna, shyǵarmashylyǵyna arnalǵan saıtty da (kazybaev.kz) tanystyra ketti.

Jınalǵan jurt Kákimjan Qazybaev tulǵasyn taǵy bir qyrynan tanyp qaıtty.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz