Májilis tóraǵasy meımanǵa Eýrazııa elderi Parlamentteri spıkerleriniń 4-keńesine qatysý úshin arnaıy kelgenine alǵys bildirip, bul Slovak memleketiniń jan-jaqty áriptestikti tereńdetýge degen yntasynyń kórsetkishi ekenin aıtty.
«Qazirgi ýaqytta elderimiz arasynda syndarly saıası dıalog ornap, saýda-ekonomıkalyq, mádenı-gýmanıtarlyq baılanystar júıeli jalǵasyn taýyp keledi. Osy jolda Qazaqstan Prezıdenti Qasym-Jomart Toqaevtyń dıplomatııalyq mıssııany Elshilik retinde qaıta qurý týraly sheshimi ózara yqpaldastyqty qoldaýdyń dáleli» delingen habarlamada.
Halyqaralyq máseleni sóz etkende Nurlan Nyǵmatýlın Slovakııanyń osy jyly EQYU tóraǵalyq etip otyrǵanyna erekshe toqtalyp, atalǵan halyqaralyq uıymmen yntymaqtyń mańyzdylyǵyna toqtaldy.
N.Nyǵmatýlın Qazaqstan Eýropa men Azııa arasyndaǵy «baılanystyrýshy kópir» bolǵandyqtan, basym baǵyttar boıynsha ózara is-qımyldy damytýdyń barlyq múmkindikterin tıimdi paıdalaný qajet ekenin aıtty. Mysaly, bizdiń elimiz ónerkásip, ınnovasııa, balama jáne jańartylǵan energııa kózderi salasynda joǵary tehnologııaly birlesken jobalardy júzege asyrýǵa yntaly. Sondaı-aq Astana Hab IT-startaptar halyqaralyq tehnoparki, jasyl tehnologııa jáne ınvestısııalyq jobalar halyqaralyq ortalyǵy aıasynda birlese jumys isteýdiń múmkindigi zor.
О́z kezeginde Andreı Danko bizdiń elderimiz áriptestiginiń áleýeti zor ekenin, Slovak eli ekijaqty, sonyń ishinde, parlamentarlyq yntymaqtastyqty odan ári tereńdetýge múddeli ekenin jetkizdi. Osy oraıda, Májilis spıkeri parlamentterimizdiń yntymaqtastyq toptar jáne beıindi komıtetter arqyly ózara saparlar almasý praktıkasyn ornatýdyń mańyzdylyǵyn, bul zańnama salasynda jan-jaqty tájirıbe almasýǵa múmkindik beretinin aıtty. Mártebeli meıman arnaıy shaqyrý úshin alǵysyn jetkizdi.
Taraptar parlamenttik forým qatysýshy barlyq elderge jan-jaqty tıimdi jáne paıdaly pikir almasýǵa keń jol ashatynyna senimdi.
