Búginde 4 myń tutynýshynyń qaryzy 2,5 mıllıard teńgeden asyp ketken. Boryshkerlerdiń kóbisi Bostandyq pen Medeý aýdandarynda turady.
Almatylyq monopolıster qaryzdaryn sot arqyly óndirip almaq.
Mundaı málimetterdi qalalyq energotıimdilik jáne ınfraqurylymdyq damý basqarmasy taratty. Alaıda qala bıligi qys mezgilinde eshkim jylýsyz qalmaıtynyn aıtady. Olar qandaı jaǵdaılar oryn alsa da Almatyny jaýratpaımyz dep otyr.
«Júrgizilip jatqan jóndeý jumystary josparlanǵan ýaqytta aıaqtalady» deıdi Almaty qalasy ákimdiligi baspasóz qyzmeti taratqan aqparatta.
Jylý júıelerin jańartýǵa 20 mıllıard teńge bólinipti.
«Bıylǵy tańda 12-magıstral boıynsha tolyq jumys aıaqtaldy. Jol salynyp bitken soń ashyldy. Biraq keıbir eskertýler bar. Eki aptanyń ishinde ol tolyǵymen aıaqtalsa, bitiremiz», dedi Almaty qalasy Energotıimdilik jáne ınfraqurylymdyq damý basqarmasynyń basshysy Áset Masabaev.
Basqarma basshysynyń aıtýynsha, Tóle bı kóshesindegi jumystar da jaqyn arada aıaqtalmaq. Olaı bolmaǵan jaǵdaıda merdiger kompanııaǵa aıyppul salynatynyn da jetkizdi.
«Qazirgi tańda tehnologııalyq jaǵynan magıstraldik jelige qosyldy. Biraq jol jáne eskertpeler boıynsha jumystardy 3 qazanǵa deıin bitiremiz dep otyrmyz», dedi Almaty qalasy Energotıimdilik jáne ınfraqurylymdyq damý basqarmasynyń basshysy Áset Masabaev.
ALMATY
