Sharanyń kún tártibine qoıylǵan taqyryptar san salaly ári ózekti. Ol jalpy alǵanda, buǵan deıin Elbasy túrli halyqaralyq alańdarda jarııa etken Qazaqstannyń syrtqy saıası bastamalarymen tyǵyz baılanysty. Atap aıtsaq, kedeıshilikti joıý, adamı kapıtaldy jaqsartý, jahandyq klımattyń ózgerýi jáne t.b. kókeıkesti máseleler.
Táýelsizdik jyldarynda elimiz Tuńǵysh Prezıdentimizdiń joǵary bedeli men sarabdal saıasaty arqasynda ǵalamdyq damý, jahandyq qarýsyzdaný men órleýdiń belsendi jaqtaýshysy retinde álemge tanyldy.
Q.Toqaevtyń bul jolǵy saparynyń maqsaty – Qazaqstannyń halyqaralyq jetistikterin nyǵaıta otyryp, ony qazirgi jahandyq ahýalǵa saı jandandyrý.
Ekinshi jaǵynan, Q.Toqaevtyń AQSh-qa sapary qarsańynda amerıkalyq The Hill gazeti jarııalaǵan maqalada atap ótilgendeı, Qazaqstan ekonomıkasyna shetel kapıtalyn tartý máselesine zor kóńil bólinbek.
Qazaqstan Prezıdenti maqalasynda «Men ınvestısııalyq ahýaldy jaqsartýdy jáne elimizde bıznesin júrgizip otyrǵan halyqaralyq seriktesterimiz ózderin qaýipsiz ári jaıly sezingenderin qalaımyn», degen-di.
Esterińizge sala keteıik, budan buryn Qazaqstan Respýblıkasy Úkimeti aldyna aldaǵy 5 jylda 30 mlrd AQSh dollarynan astam qarajat tartý mindeti júktelgen bolatyn. Demek, bul saladaǵy memleket basshylyǵynyń strategııalyq ustanymdaryn anyqtaý turǵysynda osynaý bedeldi halyqaralyq alańdy paıdalaný mańyzdy.
Osy tusta, AQSh-tyń iskerlik ortasymen baılanysty keńeıtýge baǵyttalǵan resmı emes kezdesýlerge erekshe nazar aýdaryldy. Sondaı-aq AQSh-tyń saıası ısteblıshmenti men sarapshylar qaýymdastyǵy ókilderimen tikeleı dıalog uıymdastyrylǵany da elimiz úshin mańyzdy.
Osy oraıda, Qazaqstan Prezıdentiniń saparyn aldyn ala resmı qulaqtandyrǵan jáne elimizdiń syrtqy saıası basymdyqtary boıynsha onyń kózarastaryn tolyq sıpattaǵan maqalasynyń The Hill aqparattyq resýrsynda jaryq kórýi kezdeısoq bolǵan joq. Atalǵan qural Kongress qyzmeti jáne jalpy alǵanda Vashıngtonnyń «úlken saıasaty» boıynsha mamandanǵan Amerıkanyń bedeldi saıası basylymdarynyń biri sanalady. Basylymnyń negizgi aýdıtorııasy – saıası sholýshylar men sarapshylar, lobbıshiler men sheshim qabyldaý úderisine qatysy bar basqa da tulǵalar.
Erlan MÁDIEV,
Álemdik ekonomıka jáne saıasat ınstıtýtynyń sarapshysy
