Bul kúnde derek-dáıek ataýly suıylyp, juqanasy qalǵan. Áıteýir, osy jer jánnatynda Edil qojanyń kún keshkeni anyq. Imandylyq ıirimderin jamaǵattyń boıyna sińirgen. Dinshil ǵana emes, kópshil, el qamyn oılaǵan jan bolsa kerek-ti. El ishindegi aýyq-aýyq týyndap turatyn daý-sharlardy basýǵa, aǵaıyn arasyn jarastyrýǵa, týysqandy tatýlyqqa shaqyrýǵa eren eńbegi sińgen desedi. Sol aýyzbirlikti nyǵaıtyp, keń kósilgen Qorǵaljynnyń dalasyn jaılaǵan jalpaq jurttyń uıytqysy bolǵan. Adaldyqtyń shyraqshysy – Edil qojaǵa jaza baspaı-aq sóılep, adalyn aıtyp, Alashty adamgershilikke baýraǵan peıiline oraı esimine «aq» anyqtaýyshyn qosyp, Aq Edil qoja ataǵan. Isiniń de, nıetiniń de aqtyǵyna oraı. Zamandastarynyń, sharapatyn kóp kórgen adamdardyń kirshiksiz taza kóńilinen shyqqan qoshemeti, qurmeti.
Támam jurt kisiligine tánti bolǵan soń jambasy tıgen jerge mazar salǵan. HIH ǵasyrdyń erekshe dinı eskertkishi. Syrttaı qaraǵanda pishini alyp jumyrtqa ispettes domalaq mazar boz dalada bozaryp kórinetin kıiz úıdi eske salady. Qabyrǵasy kóterilip kelip, ántek jıyrylyp, tuıyqtalady. Shıki kirpishten turǵyzylǵan. Biraq berik, myqty. Saıyn dalada san jyldar boıy syry ketse de, synyn joǵaltpaı turǵanyna qaraǵanda, burynǵylar qurylysty berik etip sala bilgen ǵoı.
Jumaı aýylyna jaqyn mańda ornalasqan Aq Edil mazary búgingi kúni ótkenniń ónegesin ómirsheń urpaǵyna uqtyryp, adaldyq pen arlylyqqa, jan tazalyǵyna shaqyryp turǵandaı.
Qorǵaljyn aýdany,
Aqmola oblysy
