Ulttyq ekonomıka mınıstri R.Dálenov negizgi makrokórsetkishter jáne bıýdjet parametrleriniń boljamy týraly baıandady, al Qarjy mınıstriniń birinshi orynbasary B. Sholpanqulov 2019 jylǵa arnalǵan naqtylanǵan respýblıkalyq bıýdjettiń jobasymen tanystyrdy.
Osy jyldyń naýryz aıynda túzetilgen elimizdiń 2019 jylǵa arnalǵan áleýmettik-ekonomıkalyq damý boljamynyń negizgi kórsetkishteriniń saqtalýyn eskere otyryp, 2019 jylǵa arnalǵan respýblıkalyq bıýdjetke naqtylanǵan kirister 7081,3 mlrd teńgeni, shyǵyndar – 12028,1 mlrd teńgeni quraıdy.
«Túzetilgen bıýdjet kiristeri men shyǵystary áleýmettik mindetterdi sheshý úshin qosymsha qarjylandyrý qajettiligin jabýǵa, ekonomıkalyq ósýdiń qosymsha kózderin qurýǵa múmkindik beredi», — dedi A.Mamın.
Ekonomıkalyq ósýdiń qosymsha kózderin óńdeý ónerkásibin qoldaýǵa arnalǵan qarajatty qaıta bólý, salymshylarǵa turǵyn úı qaryzdaryn berý úshin «Qazaqstannyń Turǵyn úı qurylys jınaq banki» AQ nesıelendirý, Pavlodar jáne Aqtóbe oblystarynyń suranysqa ıe sýarmaly jerleriniń gıdromelıoratıvti júıelerin rekonstrýksııalaý, sondaı-aq, Jambyl oblysynda aýylda kooperasııany damytýdyń pılottyq jobasyn júzege asyrý arqyly qurý josparlanǵan.
Osy mindetterdi 199,1 mlrd teńge somasynda shyǵystardy qaıta bólý jáne osy jyldyń 9 aıynyń qorytyndysy boıynsha bıýdjet kiristerin 94,9 mlrd teńge mólsherinde túzetý jolymen qarjylyq qoldaý usynylady.
Máseleni qaraý qorytyndysy boıynsha Premer-Mınıstr A.Mamın tıisti memlekettik organdarǵa belgilengen tártipte «2019-2021 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister engizý týraly» zań jobasyn Parlament qaraýyna engizýdi tapsyrdy.
