«Báıterek» UBH» AQ jáne qalalyq avtoparkterdiń basshylarymen ótken jıynda óńir basshysy qazirgi ýaqytta avtoparkter úshin nesıelendirýdiń óte tıimdi sharttary bar ekenin eske saldy.
– Osy mehanızmderdi paıdalanyńyzdar. Eger sizder jyljymaly quramdy jańartý boıynsha mindetteme alatyn bolsańyzdar, biz óz tarapymyzdan sýbsıdııalaýdy arttyrýǵa daıynbyz. Eger olaı bolmasa, biz sýbsıdııalaýdy toqtatamyz. Álbette, biz mundaı qatań sharalarǵa barǵymyz kelmeıdi jáne mýnısıpaldyq avtopark qurýdy kózdep otyrǵan joqpyz. Alaıda avtobýstardyń tozýyna baılanysty jolaýshylardyń qaýipsizdigine qaýip tónetin bolsa, ondaı qadamǵa barýymyzǵa týra keledi, – dedi ol.
Eske salsaq, osy áńgimeden sál buryn Qaraǵandydaǵy №3 avtopark 75 jańa avtobýs satyp alǵan bolatyn. Búgingi tańda olardyń birazy jolaýshylarǵa qyzmet kórsete bastady.
Jalpy aldaǵy ýaqytta oblys ortalyǵynda barlyǵy 553 avtobýsty jańasyna aýystyrý qajet bolady.
Qaraǵandy oblysy
