Premer-Mınıstr jumys saparymen Shymkent jáne Túrkistan qalalarynda boldy

Shymkent qalasynda Asqar Mamın «Badam» turǵyn úı alabynyń ınjenerlik ınfraqurylym jaǵdaıymen tanysty. Úkimet basshysynyń munda kelýiniń ózindik sebebi de bar.  Turǵyn úı alabyndaǵy máselege, ıaǵnı onyń elektrmen jabdyqtaý problemasyna oraı mektep muǵalimi Gúlnaz Ábdirova Nur Otan partııasyna júgingen bolatyn. Máseleni Nur Otan partııasynyń qoǵamdyq qabyldaýynda azamattardy jeke qabyldaý barysynda jetkizgen. Úkimet basshysy G.Ábdirovaǵa turǵyn úı ala­byndaǵy 195-oram úılerin elektr­men jab­dyqtaý jumystaryn osy jyldyń jeltoqsan aıynda aıaqtaý qarastyrylǵanyn, sý qubyry jáne gaz jelilerin salý jobasy bo­ıynsha joba­lyq-smetalyq qujattama ázirlenip jatqanyn aıtty.

Sondaı-aq Premer-Mınıstr arheo­lo­gııalyq qazba jumystary kezinde tabylǵan «Shymkent qalashyǵyn» restavrasııalaý já­ne mýzeılendirý jónindegi «Sıtadel» joba­synyń alańyna bardy. Jobanyń tarıhı qundylyǵy bar jáne ol 2020 jyly «Shymkent – TMD-nyń mádenı elordasy» jylyn atap ótý aıasynda tartymdy týrıstik nysan bolýǵa laıyqty.  Úkimet basshysy jumys sapary barysynda Qazaqstan naryǵymen qatar, О́zbekstan, Qyrǵyzstan jáne Tájikstan naryqtaryna ónimderin jetkizetin «Zerde-Keramıka» keramogranıt óndirý zaýytyna bardy. О́ńirdiń toqyma salasyn jandandyrý josparlarymen tanysty. Bıylǵy 8 aıda Shymkent qalasynda ónerkásiptik ónim óndirisiniń kólemi 359,6 mlrd teńge bolǵan. О́ńdeý ónerkásibi óndirisi 17,8%-ǵa, onyń ishinde hımııa ónimderi óndirisi 21%-ǵa, metallýrgııa – 25,9%-ǵa, munaı ónimderi óndirisi 31,5%-ǵa ósti. Shymkent qalasynda jumys istep turǵan shaǵyn jáne orta kásipkerlik sýbektileriniń sany 67,2 myń birlikke jetti nemese 2018 jyldyń sáıkes kezeńimen salystyrǵanda 114,5%-dy quraıdy.

Úkimet basshysyna ótkizý qabileti saǵatyna 400 jolaýshyny quraıtyn Shymkent qalasy áýejaıy jańa termınalynyń jobasy tanystyryldy. Jańa nysandy 2020 jylǵy qazan aıyna deıin aıaqtaý kózdelgen. Sondaı-aq Premer-Mınıstrge Túrkistan qalasyn jańǵyrtýdyń 1-kezeńi aıasyndaǵy jumystar barysy baıandaldy. A.Mamın ákimshilik, áleýmettik jáne tarıhı-mádenı mańyzy bar nysandardyń, ákimdik, basqarmalar jáne departamentter ǵımarattarynyń, medıa ortalyqtyń, «Nur-Sultan» alańynyń, Olımpıada rezervi sport mektebiniń, Halyqqa qyzmet kórsetý ortalyǵynyń, mýzyka mektebiniń, attraksıondary bar qala saıabaǵynyń, neke qııý saraıynyń, vızıt-ortalyqtyń, Shyǵys monshasynyń, amfı­teatr men qalalyq Arbattyń qurylysy barysyn tekserdi. Qazirgi tańda kóne shahar­daǵy qurylys jumystary 16 sektorǵa bólinip, olarǵa oblystyń basqarmalary men aýdan-qalalary, qalalyq ákimdiktiń bólimderi jaýapty bolyp bekitilgen. Barlyq aýmaqta jumys tynymsyz júrgizilýde. Aldaǵy ýaqytta Túrkis­tanda úlgili kóshe, aýlalar anyqtalyp, úzdikterge qoshemet kórsetilmek.

Jumys saparynda Premer-Mınıstr A.Mamın Túrkistan oblysynyń ákimi О́.Shókeev­pen jáne Ekologııa, geologııa jáne tabıǵı re­sýrstar mınıstri M.Myrzaǵalıevpen birge N.Oń­dasynov atyndaǵy alleıaǵa aǵash egip, kóshet otyrǵyzý boıynsha respýblıkalyq aksııany bastady.

 Túrkistan oblysy