Osymen ekinshi jyl qatarynan shymyldyǵyn túrgen aıtýly joba mektep oqýshylaryn halyq poezııasy men qazaqtyń rýhanı asyl murasyna sýsyndatyp, eldik rýhta tárbıeleýdi maqsat tutqan. Bıylǵy dodada Almaty qalasyndaǵy 100-den asa mektepten barlyǵy 1100 oqýshy jáne olardy baýlyǵan 600 tálimger baq synady. Qalalyq kezeńniń aqtyq synynda 8 aýdannan sýyrylyp shyqqan 24 oqýshy óner kórsetti.
Baıqaýǵa aıtýly ǵalymdar men zııaly qaýym ókilderi qazylyq jasady. Atap aıtar bolsaq, M.O. Áýezov atyndaǵy Ádebıet jáne óner ınstıtýtynyń dırektory Kenjehan Matyjanov, Almaty qalasy ákimi apparatynyń Tilderdi damytý jáne latyn grafıkasyna kóshý ortalyǵynyń basshysy Mamaı Ahetov, Ál-Farabı atyndaǵy QUÝ Jýrnalıstıka fakýltetiniń dekany, aqyn Saǵatbek Medeýbekuly, J.Elebekov atyndaǵy Estrada jáne sırk kolledji «Halyq áni» bóliminiń meńgerýshisi, ánshi Talǵat Ábýǵazy, «Zań» medıa-korporasııasynyń basshysy, jýrnalıst Dosymbek О́teǵalıev, A.Baıtursynuly atyndaǵy Til bilimi ınstıtýtynyń ǵylymı qyzmetkeri, «Qazaqstannyń 100 jańa esimi» jobasynyń jeńimpazy Qýanysh Jumabekuly oqýshylardyń ónerin baǵalady.
Baıqaýdyń alǵashqy synynda órender juptasyp óner kórsetti.
Ádil qazylar men jınalǵan kópshilik aldyna shyqqan 12 jup «Qobylandy batyr» jyrynyń kez kelgen jerinen úzindi oqyp, birin-biri jalǵastyryp otyrdy. Olardyń ishinde epostyq jyrdy múdirmesten oqyǵandar da, ádemi maqammen, ártistik qabiletin pash etkender de, tipti dombyramen súıemeldep, áýen arqyly áserli etip jetkizgender de boldy. Qazylar qoıǵan upaı sandary boıynsha ekinshi kezeńge joldama alǵan 12 oqýshy ádebıet teorııasy boıynsha suraqtarǵa jaýap berdi. Aıta keterligi, suraqtar ár qatysýshynyń qaı synypta oqıtynyna baılanysty arnaıy tańdap alynǵan. Al baıqaýdyń úshinshi kezeńine bılettegi suraqqa jáne qazylardyń saýalyna qatesiz jaýap berip, joǵary upaı enshilegen 5 oqýshy ótti. Olar aqtyq synda «Qobylandy batyr» jyryndaǵy kónergen sózderdiń maǵynasyn ashyp, jyrdyń sol sóz kezdesetin bóligin jatqa aıtty.
Kórermenniń ystyq yqylasyna bólenip, qazylar alqasynyń joǵary upaıyna ıe bolǵan jeńimpazdar men olardyń tálimgerleri qomaqty aqshalaı syılyqqa ıe boldy.
– Elbasynyń «Rýhanı jańǵyrý» baǵdarlamasy aıasynda qolǵa alynǵan bul jobanyń mańyzy zor. О́tken jyly Almatyda qala ákimdiginiń qoldaýymen bastalǵan «Alpamys batyr» jyryn jatqa aıtýdan «Tulpar minip, tý alǵan» jobasy bıyl «Qobylandy batyr» dastanyn dáripteýge ulasty. Jobanyń maqsaty – qazaq aýyz ádebıetiniń altyn ózegi batyrlar jyryn jastar arasynda dáripteý, óskeleń urpaqtyń ulttyq rýhyn kóterip, jigerin janý. Eldik pen erlik, ádildik pen shynshyldyq, batyrlyq pen janashyrlyq sekildi asyl qasıetterdi jastardyń boıyna darytý. Jobaǵa oqýshylarmen qatar olardy daıyndaǵan muǵalimder tarapynan da qyzyǵýshylyq artýda, – deıdi Almaty qalasy Qoǵamdyq damý basqarmasy basshysynyń orynbasary Shegebek Qaýymbaev.
ALMATY
