Birinshi qatelik. «Er-azamattar baqylaý men qoldaýdy» ajyrata almaıdy. Áıeliniń ne isteý qajettigi týraly qoldaýy men keńesi erkek úshin buıryq, basqarý, ıakı baqylaý sııaqty bolyp kórinýi ábden múmkin. Bul kezde súıikti áıeliń dıktant jazyp otyrǵanda tóbeńnen tónip qarap turatyn qatal muǵalim sııaqty bolyp kórinbek. Mundaı jaǵdaıda kóp adamdar úlken is tyndyrmaq túgili, bir árip te jaza almaı qalady.
Ekinshi qatelik. «Bárin ózim isteımin, ol kórip uıalyp qalsyn». Jo-joq, endigi jerde jigitke endi ol tirlikti atqarýdyń qajeti men qyzyǵy shamaly. «Áıelder de istep tastaıtyn iste meniń ne sharýam bar?». Er-azamattar áıelderdiń qolynan keletin jumysty nesine atqarsyn?!
Al áıel baıǵus erkekter isteı alatyn jumysty da isteı alatynyn dáleldegisi keledi. «Men basqa áıelder sııaqty, názik, aqsaýsaq emespin, otbasymnyń baqyty úshin bárinen de taıynbaımyn» degendi bildirgisi keledi.
Úshinshi qatelik. «Tymyraıyp alý». Áıeldiń aýzyna qum quıylǵandaı, kúıeýine sóılemeı, tymyraıyp júrip alýy bóriktilerge túk te unamaq emes. Renjigenińdi, isiniń unamaıtynyn bildirý úshin áıelderdiń qabaǵyna qar jaýyp júrip alýyn er-azamattar jaza retinde qabyldaıdy. Psıhologııalyq turǵyda óte jaǵymsyz áser alady. Sondyqtan da bolashaqta mundaı jaǵdaılardan qashqalaqtap nemese aıtatyn ýájin daıyndap júredi.
Tórtinshi qatelik. «Odan da túk istemegeniń jaqsy edi». Keıbir qyz-kelinshekterge ne isteseń de jaqpaısyń. Eger ol áıeli josparlaǵandaı, ıakı istegen isi kóńildegideı bolyp shyqpasa erkektiń qulaǵynan qańqý ketpeıdi. Bar ónerin, ýaqytyn, kúsh-jigerin salyp istegen jumysy úshin qanshama júıkesi egelip, tek qajaý sóz estıtin bolsa, endi ol iske kúıeýiń qulyqty bolady, jolaıdy dep, tipti, oılamaı-aq qoıyńyz.
Besinshi qatelik. «Jurttyń kúıeýi keremet». Joldasyńyzdy basqalardyń kúıeýimen salystyrýdyń qajeti shamaly. Bul onyń namysyna ǵana tımeıdi, «meıli soǵan baryp tıip al, soǵan jasatyp al» degendi de estip qalýyńyz ǵajap emes. Er-azamattar úshin áıeli Olımpıadadan jeńip alǵan óz medali ispettes. Demek, áıeli úshin óziniń kúıeýinen artyq kisi joq bolýǵa tıisti.
Basqa bireýdiń kúıeýin maqtap, sonymen salystyryp, aýzynyń sýy quryp otyrǵan kelinshekti er-azamattar qabyldaı bermeıdi. Bul áıelderdiń arasynda ǵana bola beretin báseke.
