«Almaty bıýdjeti 500 mlrd teńgeden asady. Onyń kóp bóligi aǵymdaǵy shyǵyndarǵa, qalalyq ınfraqurylym men áleýmettik baǵdarlamalardy qarjylandyrýǵa jumsalady.100 mlrd teńgeden astam qarjy - bul jańa nysandardy qurý nemese qoldanystaǵy nysandardy qaıta qurýǵa ketetin bıýdjet. Biz «Jańa Almaty» baǵdarlamasyn ázirledik. Tek osy baǵdarlamany júzege asyrý úshin 5 jylǵa 800 mlrd teńgege jýyq qarajat kerek. Bul bıýdjettik jáne jeke ınvestısııalar», - dedi Saǵyntaev.
Ákimniń túsindirýinshe, ınvestısııa tartý men bıznestiń belsendi damýy óte mańyzdy faktor.
«Bul qalalyq bastamalardy júzege asyrý jáne almatylyqtardyń ál-aýqatyn arttyrý úshin salyqtyń ósýin qamtamasyz etedi. Olar óz kezeginde qor jınap, qala ekonomıkasynyń damýyna ınvestısııa quıa alady. Biz úshin Astana halyqaralyq qarjy ortalyǵy syndy qalyptasý kezeńinen ótken alańdy paıdalaný óte mańyzdy. Ásirese ınvestısııalyq damý qorymen yntymaqtastyqqa múddelimiz», - dedi Almaty ákimi.
Eske salaıyq, buǵan deıin Saǵyntaev «Jańa Almaty» baǵdarlamasy boıynsha qalanyń qalaı damıtyny jáne bul jobanyń qalaı júzege asyrylatyny týraly habarlaǵan bolatyn.
Osyǵan deıin Memleket basshysy Qasym-Jomart Toqaev Qazaqstan halqyna Joldaýynda el damýynyń 5 basym baǵytyn aıqyndap, memleket aldynda turǵan mańyzdy mindetterdi belgilep berdi.
Atap aıtqanda, talabyna saı tıimdi memleket qalyptastyrýǵa, azamattardyń quqyqtary men qaýipsizdigin qamtamasyz etýge, qarqyndy damyǵan jáne ınklıýzıvti ekonomıka qurýǵa, áleýmettik jańǵyrýdyń jańa kezeńin bastaýǵa jáne óńirlerdiń qýattylyǵyn arttyrýǵa, onyń ishinde «Almaty qalasynyń erekshe mártebesi týraly» Zańǵa asa kóńil bólindi.
Almaty – Orta Azııadaǵy eń iri óńirlik iskerlik jáne qarjy ortalyǵy. El ekonomıkasynyń eń basty qozǵaýshy kúshi bolyp tabylatyn shaǵyn jáne orta bıznes qalasy. Elimizdegi halyqaralyq qurylymdar men qarjy ınstıtýttarynyń, iri IT-kompanııalardyń, joǵary oqý oryndarynyń basym bóligi osynda ornalasqan.Sol sebepti «Jańa Almaty» jobasynyń bul mańyzdy mindetterdi atqarýdyǵa orny erekshe.
Gúlbarshyn AITJANBAIQYZY
ALMATY
