Káripbek Kúıikov Qaraǵandy oblysynyń Semeı ıadrolyq polıgonynyń mańyndaǵy Egindibulaq aýylynda dúnıege kelgen. Qanshama jandy qan qaqsatqan zulmattyń zardabyn bir kisideı tatqan sýretshi bul taqyrypty óz shyǵarmashylyǵynyń ózegine aınaldyrdy. «Alǵashqy jarylys» týyndysynda týyndyger kúıip ketken dalanyń ortasynda kókke qaraı kóterilgen jan túrshigerlik ıadrolyq sańyraýqulaqty beıneleıdi. Onyń keıingi barlyq týyndylary da osy taqyrypty tereńnen qaýzaǵan.
Á.Qasteev atyndaǵy óner mýzeıinde álemdik antııadrolyq qozǵalystyń belsendisi, halyqaralyq «ATOM» jobasynyń qurmetti elshisi atanǵan qylqalam sheberiniń jeke kórmesi ashyldy. Ekspozısııaǵa ár jyldary salynǵan 50 kartına qoıylǵan.
– Búgin qandaı da bir jetistikke jetsem, ol birinshi kezekte ata-anamnyń arqasy. Dárigerlerdiń úkimine qaramastan, meni dalaǵa tastamaı, baǵyp-qaǵyp, osy kúnge jetkizdi. Alty jasymnan bastap sýret saldym. Qabiletimdi alǵash baıqap, qoldaý kórsetken, shyǵarmashylyq turǵyda jetilýime yqpal etken de sol jandar. Semeı ıadrolyq polıgonynan 100 shaqyrymdaı jerdegi Egindibulaq aýylynda dúnıe esigin ashtym. Ata-anam sol synaqtardy óz kózimen kórgen. Ákem talaı tarıxı oqıǵalardy áńgimelep otyratyn. Polıgonnan zardap shekken kóptegen otbasyn bilemin. Meniń ákemniń áriptesi 10 bala súıdi. Biraq barlyǵy da aýrý bolyp týyp, shetinep ketti. Qaıran ákeniń júregi bul kúıikke shydaǵan joq. Mundaı jaǵdaılar óte kóp, – deıdi Káripbek Kúıikov.
Kórmeniń ashylý saltanatyna qatysqan «Nevada – Semeı» antııadrolyq qoǵamdyq qozǵalysynyń ókilderi Kúıikovtiń bul taqyryptaǵy izdenisteri dara mánge ıe ekenin, ıadrolyq synaq zalalyn qamtyǵan kartınalaryn álemdik qaýymdastyq beıbitshilikti tý etken dara týyndylar retinde moıyndaıtynyn jetkizdi. Osydan jıyrma jyl buryn Qazaqstannyń antııadrolyq kezeńiniń sımvoly bolǵan Káripbek Kúıikovtiń shyǵarmalary Amerıka, Japonııa, Germanııanyń jeke jáne memlekettik kolleksııalarynda saqtaýly. Sýretshiniń kórmeleri Japonııa, AQSh, Germanııa, Túrkııa, Qytaı sekildi álemniń birqatar elinde kópshilik nazaryna usynylǵan.
ALMATY
