Instıtýt tarıhyndaǵy osynaý dara turar dataǵa oraı áskerı qyzmetshiler men kýrsanttardyń, Qarýly Kúshter jáne áskerı ınstıtýt ardagerleriniń qatysýymen saltanatty shara ótti.
Jınalǵandardy aıtýly kúnmen quttyqtaǵan oqý ordasynyń bastyǵy general-maıor Asqar Mustabekov búgingi kýrsanttardyń áskerı ınstıtýttyń aıshyqty dástúrlerin laıyqty túrde jalǵastyratyndyǵyna senim bildirdi.
«Bizdiń jetistigimiz árbir áskerı qyzmetshiniń, oqý ornynyń barlyq azamattyq personalynyń sanaly túrde jáne aıanbaı ter tókken eńbeginiń jemisi. Sizder áskerı bilim berýdi damytýǵa, joǵarǵy oqý ornynyń nyqtap qalyptasýyna, bolashaq ofıserlerdi daıyndaýǵa laıyqty úles qosasyzdar. Osynyń arqasynda bizdiń ınstıtýt elimizdiń áskerı joǵarǵy oqý oryndary arasynda jetekshi ujymdardyń biri bolyp sanalady. Qazaqstan Qarýly Kúshteri úshin ofıser kadrlaryn daıarlaý boıynsha memlekettik mindetterdi tabysty oryndap keledi»,- dedi Asqar Mustabekov.
Áskerı ınstıtýt 18 jyldyń ishinde Áýe qorǵanys kúshteri, qazaq armııasynyń basqa áskerı túrleri men tekteri qataryn toltyrǵan 1 730-ǵa jýyq leıtenantty tárbıelep shyǵarǵan. 185 túlek oqýdy úzdik bitirse, onyń 27-si «Áskerı oqý ornyn úzdik bitirgeni úshin» tós belgisimen marapattalǵan. Qazaqstan Respýblıkasy Qarýly Kúshteri Joǵary Bas qolbasshysy óz qolymen 18 túlekke dıplom tabys etken.
Radıoelektronıka jáne baılanys áskerı ınjenerlik ınstıtýty zenıtti zymyran, radıtehnıkalyq áskerler, avıasııany redıotehnıkamen qamtamasyz etý baılanys bólimi úshin bilikti ofıserlerdi, sondaı-aq áskerler men qarý-jaraqty basqarýdyń avtomattandyrylǵan júıeleriniń ınjenerlerin daıyndaıdy. Ofıserler-radıoınjenerlerdi daıarlaý 5 mamandyq boıynsha júrgiziledi.
Áskerı JOO zamanaýı oqý-materıaldyq bazamen qamtamasyz etilgen. Oqý aýdıtorııalary men zerthanalary túrli radıotehnıkalyq stendttermen, kompterlik jáne lıngofondy tehnıkalarmen, sımýlıatorlarmen, sondaı-aq jattyǵý keshenderimen jabdyqtalǵan.
Kýrsanttar teorııalyq bilimderin, ınstıtýttyń oqý ortalyǵynda jetildire túsedi. Bolashaq ofıserler shynaıy jaýyngerlik tehnıkalarda tájirıbeden ótip, radıolokasııalyq beketter men baılanys áskerı tehnıkalaryna qyzmet kórsetedi.
