– Qaraǵandyǵa árdaıym erekshe sezimmen kelemin. Klassıkalyq mýzykaǵa, meniń shyǵarmashylyǵyma degen súıispenshilikterińizge basymdy ıip alǵys aıtamyn! Qaraǵandy orkestrimen birge óner kórsetý men úshin erekshe baqyt, – dedi álemge áıgili mýzykant.
Shyǵarmashylyq kesh barysynda Mádenıet jáne sport mınıstri Aqtoty Raıymqulovanyń óner maıtalmanyna arnap joldaǵan quttyqtaý haty oqyldy. Oblys ákimi Jeńis Qasymbek halyq ártisine altyn ýaqyt qıyp, Arqaǵa kelip óner kórsetkeni úshin alǵys sezimin jetkizdi. Sondaı-aq, ol Jánııa Áýbákirova úshin Qaraǵandy oblysynyń bóten emestigin, onyń ákesiniń osy óńirdegi Shet aýdanynyń týmasy ekenin aıta kelip, óner juldyzyna shyǵarmashylyq tabys tiledi.
Konsertten keıin aýa raıynyń qolaısyzdyǵyna qaramastan, «Kenshi Dańqy» eskertkishi janyndaǵy «Juldyzdar alleıasy»mańyna ónersúıer qaýym kóptep jınaldy. Bul jerde Jánııa Áýbákirovanyń aty-jóni jazylǵan eskertkish belgi saltanatty túrde ashyldy.
Áıgili mýzykanttyń ózi tolqynysyn jasyra almaı, kórsetilgen syı-qurmetke shynaıy alǵysyn bildirdi. Zor tebirenistiń ústinde turyp, Qaraǵandy oblysynyń ósip-órkendeýine tilektes ekendigin jetkizdi.
– Umytylmas sát! Mundaı qurmet óner adamdaryn keremet qanattandyrady. Men baqyttymyn. Árıne, Qaraǵandy jerinde meniń ónerim moıyndalatyny – men úshin erekshe marapat, erekshe maqtanysh. Bul men úshin asa qymbat. Shyǵarmashylyq, shabyt, jalpy ómirim úshin óte kúshti serpin beredi, – dedi Jánııa Áýbákirova aǵynan jarylyp.
Eske salsaq, Qaraǵandydaǵy «Juldyzdar alleıasy» 2007 jyly «Qaraǵandy – meniń jastyǵymnyń qalasy» atty birinshi retro-festıval aıasynda ashylǵan bolatyn. Munda birinshi bolyp halyq ártisi Bıbigúl Tólegenovanyń aty-jóni jazylǵan eskertkish belgi qoıylǵan. Sondaı-aq, atalǵan alleıada Roza Rymbaevanyń, «Dos-Muqasan» ansambliniń, Qaırat Baıbosynovtyń, Eskendir Hasanǵalıevtiń, Maqpal Júnisovanyń, Bolat Syzdyqovtyń jáne basqa da mádenıet pen óner qaıratkerleriniń ataýly belgileri bar. Al halyq ártisi, Memlekettik syılyǵynyń laýreaty, Tuńǵysh Prezıdentiniń Memlekettik beıbitshilik jáne progress syılyǵynyń laýreaty Jánııa Áýbákirovanyń qurmetine arnalǵan ataýly belgi «Juldyzdar alleıasynda» jaǵylǵan onynshy juldyz.
Qaraǵandy oblysy
