«Samuryq-Qazyna» óńirde jańa jobalarǵa qoldaý kórsetedi

Qurylys jumystarynyń barlyǵy derlik belgilengen merzimde aıaqtalǵan. Ulttyq ál-aýqat qory mindetine alǵan nysandardyń qurylysy tolyq aıaqtalǵanyn kúni keshe Arys qalasyna issaparmen kelgen «Samuryq-Qazyna» UÁQ» AQ basqarma tóraǵasy Ahmetjan  Esimov málim etti.

Basqarma tóraǵasy aldymen Arys qalasyndaǵy jón­deýden ótken, 65 jyl­dyq tarıhy bar «Aqnur» bala­baqshasynda boldy. Bala­baqsha meńgerýshisi Aqbópe Qaınybekovanyń aıtýynsha, búgingi tańda 5 topta 120 búldirshin tárbıelenýde. Án, bı syndy úıirmeler ju­mys isteıtin, úsh tildi bi­lim berýge den qoıǵan bala­baqshada 31 tárbıeshi qyzmet etedi. Sodan keıin, Ahmet­jan Esimov qurylysy tolyǵy­men aıaqtalǵan temir jol vok­zalynyń jumysymen tanysty. Qaıta jóndelip, fýtbol oıyndary ótip jatqan stadıonǵa baryp, «Arys» jáne «Ordabasy» jastar komandasynyń kezdesýinde dopty oıynǵa qosty. Issa­par barysynda Túrkistan oblysynyń ákimi О́mirzaq Shókeev apattan keıingi aılarda atqarylǵan jumystar jaıly aıtyp ótti. «Tótenshe jaǵdaıdan keıin 2-3 aı ishinde qala tolyǵymen qaıta qalpyna keltirildi. Onda 7164 úı qaıta jóndeýden ótti. 400-den astam úı buzy­lyp qaıta salynyp jatyr. Oqıǵa kezinde biz halqy­myz­dyń birligin kórdik. Elbasy saıa­satynyń arqa­syn­da myq­ty qoǵamnyń qalyp­tas­qan­dy­ǵyn, sondaı-aq mem­leket­tiń áleýetin kórdik», deı kele oblys ákimi áleý­met­tik ın­fra­qurylymdy salý jáne qal­pyna keltirý ju­mys­­taryn júrgizgeni úshin «Sa­muryq-Qazyna» UÁQ» AQ bas­­shy­ly­ǵy­na alǵysyn jetkizdi.

Sondaı-aq «Samuryq-Qazyna» UÁQ» AQ basqarma tóraǵasy Ahmetjan Esimov pen Túrkistan oblysynyń ákimi О́mirzaq Shókeev ynty­maq­tastyq týraly Memo­ran­­dýmǵa qol qoıdy. Memo­randýmǵa óńirdi gazdandyrý, energetıka kesheni, elektrondy saýda men posh­ta jelisin, aqparattyq-kom­mý­nıkasııalyq ınf­ra­qu­rylymdy damytý jáne áleý­­mettik nysandardy salý sııaqty 9 baǵyt kiredi. Osylaısha Arys jáne Túrkistan qalalaryn «aqyldy qala» (Smart City) servıstik úlgisi boıynsha damytý kózdelip otyr. Qor óńir­degi 97 mektep pen aýrý­hanaǵa deıin talshyqty-optı­kalyq baılanys jelisin jáne radıojelilerdi salýdy, Arys qalasyndaǵy 12 mektep, 2 aýrýhana, 2 balabaqshada 400 beınebaqylaý kameralaryn jáne 50 «WiFi» núktesin uıymdastyrýdy qamtamasyz etpek.  «Qazirgi tańda Túrkistanda qor kompanııalarynda 19 myńnan asa qyzmetkeri bar 20 kásiporyn men fılıal jumys isteıdi. Elektrenergetıka, gaz, posh­ta, aqparattyq kommýnıka­sııa jáne ekonomıkanyń basqa da salalary boıynsha birneshe jobalardy júzege asyrýda», dedi Ahmetjan Esimov. О́z kezeginde О́mirzaq Shókeev bul memorandým aldaǵy ýaqytta óńirdiń áleý­mettik-ekonomıkalyq damýyna jáne halyqtyń ál-aýqatyn kóterýge septigin tıgizetinine senim bildirdi.

Memorandýmnyń basym bóligi satyp alý másele­sine, atap aıtqanda, ımport almas­tyrý jáne jergi­lik­ti qamtýdy damytýǵa arnal­ǵan. Qor uzaq merzimdi kelisim­sharttar jasaý arqyly Túrkistan oblysynda jańa óndiristerdi qurýdy kózdeıtin jobalarǵa qoldaý kórsetedi. Al oblys ákimdigi óz tarapynan ja­ńa óndirister qurý boıyn­sha jobalardy irikteýdi qam­ta­masyz etedi. Sonymen qatar taraptar Túrkistan oblysynyń áleýmettik salasy máselelerin talqylady. Bul oraıda qor serebraldy sal aýrýynan balalardy ońaltý baǵyty bo­ıynsha áleýmettik máseleler­di sheshýge, naýqas adam­dar­­­dy qatarǵa qosý kabınet­­terin materıaldyq-tehnıkalyq ja­raq­tandyrýǵa, salamatty ómir salty men sportty nasıhattaýǵa qarjylaı qol­daý kórsetedi. Máselen, Túrkistan qalasyndaǵy amfıteatr, oqýshylar saraıy, 7000 oryndyq stadıon, Qoja Ahmet Iаsaýı atyndaǵy murajaı, kongress-holl, «Smart City» jobasy sııaqty áleýmettik nysandardy salýǵa jáne baılanys jelilerin júrgizýge jalpy 33,6 mlrd teńge bólingen.

Túrkistan oblysy