Baldaqqa súıengen taǵdyr

Tabıǵat jaratylysynan teperish kórgen jandarǵa «Biz siz­dermen birgemiz!» degen sóz­ben súıep, shynaıy demeý bola alatyn ujymdar bar. Má­se­len, «Azamattarǵa arnal­ǵan úkimet» memlekettik korpo­ra­sııa­synyń Almaty fılıaly qyz­metkerleriniń ujymdaǵy múge­dektigi bar áriptes­terine aıta­tyn qoldaý sózi de osy – «Biz sizdermen birgemiz!».

Búginde fılıalda birinshi toptaǵy – 6, ekinshi toptaǵy – 26, úshinshi toptaǵy – 20, barlyǵy 52 múgedektigi bar maman jumys isteıdi, olar­dyń 42-i joǵary bilimdi. Múge­dektigi bar azamattardy ju­myspen qamtý máselesin korporasııa basty nazarda ustap, qoǵamnyń basqa toptarymen teńestirý maqsatynda kóptegen jaǵdaı jasalǵan. Jumysqa qabyldaý úshin arnaıy kvota qarastyrylyp, synaqsyz jumysqa alynady. Sonyń nátıjesinde bú­gin­de bólimsheniń front-keńse­leri men bek-ofısterinde múgedektigi bar jastar qata­ry­nan qalmaı, halyqqa sapaly qyzmet kórsetip otyr.

Úshinshi toptaǵy múgedektigi bar Baýyrjannyń Medeý aýdandyq front-keńsesinde eńbek etkenine bir jyldan assa, ekinshi toptaǵy múgedektigi bar Temirlannyń kelgenine tórt aı bolǵan. Ekeýi de ujymǵa tez úırenip, áriptesterimen etene aralasyp ketti. Jumysqa jańa qabyldanǵan jastardy jatsynbaı, baýyrǵa tartyp, bar bilgenin úıretken áriptesteri endi eki jigittiń alǵyrlyǵyna, eńbekqorlyǵyna tánti.

Fılıal basshysy Danııar Qyryqbaev ta óte eńbekqor, izdenimpaz, jaýapkershiligi mol mamandarǵa dán rıza. «Jas­tardyń jumysqa degen yntasy, bilimge degen qushtarlyǵy qýantady. Búgin­de olar óz úırengenderin ózge­ler­ge úıretetin dárejege jetti. Qaladaǵy JOO-lar men mekemelerde ótetin sıfrly qyzmetterdi úıretý jumystarynyń bel ortasynda Baýyrjan júredi. Al Temirlan bolsa, az ýaqyttyń ishinde jumystyń qyr-syryn meńgerip aldy», deıdi ol.

Temirlan da osyndaı ujym­ǵa tap kel­genine rıza. «Bil­­megenimdi úıretip, qol­ush­yn berýge daıyn jandar kóp. Eńbegimdi baǵalap, kótermelep otyrady. Jumy­sym qyzyqty, ýaqyttyń qalaı ótkenin de baıqamaı qala­myn. Kelgender kórsetken qyzmetime alǵystaryn aıtqan­da, kádesine jarap jatqanyma qýanamyn», deıdi Temirlan Asýbaev.

Osylaısha birligi jaras­qan uıymshyl ujym múge­dek­tigi bar jandardy «Biz siz­der­men birgemiz» dep baýyrǵa basyp, endi «Biz bárimiz birgemiz, ydyramas irgemiz!» dep urandaıdy.

ALMATY