Kentavr kıesi
Dúleı jel ushyryp áketpek bolǵan taldaǵy jalǵyz sary japyraqtan kóz almaı, aıǵyz tereze janynda tósek tartyp jatqan aqsaqal qaltyraı tústi. Kenet bólmege saý etip kirip kelgen jigitiń júzinen jastyq shaǵyn kórip, jas baladaı jylap jiberdi. Es bilgeli Amerıkadaǵy Robertter otbasynda tárbıelengen Mıras edenge tizerleı otyra ketip, ájim basqan saýsaqtardy aıalap:
- Amansyz ba, ata! Men búgin baqytymyn: sizdi kórdim. Aıtyńyzshy, ákem qaıda? – dedi.
- Oı, aınalaıyn! Qosh keldiń, kózimniń nury! Ákeń aýǵannan soǵys aıaqtalǵan jyly kelgen. Myrysh tabytpen!
- Al, anam she?
- Shesheńniń saýdager bolǵanyna otyz jyldan asty: sen jatpaǵan besikti áli sata almaı júr. Sen perzenthanadan qoldy bolǵaly kóleńkesimen kúndes bolyp urysatyndy shyǵardy.
- Ata, siz aıaq kıimniń bir jaǵyn ǵana tozdyrypsyz ǵoı.
- E-e, fashısterdiń arqasy ǵoı. Saýdagerge ekinshi aıaq úshin de tóleımiz. Qalyń qalaı, nemerem? Sheteldegi áke-shesheń adam bolýdy úıretken shyǵar?
- Iá, anam maǵan shabandoz bolýdy úıretti. Avıator ákemniń parashýty ashylmaı qalǵanda men on jasta edim. Anam jyl saıyn 31 mamyrda «Búgin bizdiń otasqan kúnimiz, Mıras, bizdi ońasha qaldyrshy» dep ózine bir adamdyq ústel daıyndaıtyn. Arǵy atasy qypshaq bolǵan Lýıza anam meniń túsime nelikten ylǵı saıyn dala, shurqyraǵan jylqylar kiretinin aıtty. Sol sátke deıin tilim de, júregim de amerıkalyq bolǵan edi; qazir tilim – túrkige ortaq, júregim - kentavrdiki. Anam da ekinshi ómirin osynda ótkizbekshi: sizge sálem salýǵa kezek kútip tur.
Jalǵyz japyraq úzilip túsken sátte aqsaqaldyń júzi qýanqy tartyp, qyryldaı bastady.
- Ata, sizge ne boldy? – dep janushyra surady Mıras.
- Janyma ákeń kelip tur. Ol meni ózimen birge Asan qaıǵy armandaǵan Jeruıyqqa alyp ketetiniń aıtty.
Jigittiń janary jasqa shylandy. Qarııanyń ańǵalaǵynyń ishinde sónip bara jatqan sáýleden kóz almaı:
- Ol sizge ne aıtty?
- Áke, qarashańyraqtyń ıesi keldi. Jaqsy óldiń ǵoı, - dedi.
Ashat О́mirbaev
