Kezdesýge Mańǵystaý oblystyq Qazaqstan halqy Assambleıasynyń hatshylyq meńgerýshisi G.Ismýrzına, «Qoǵamdyq kelisim» KMM-niń basshysy A.Jaıylhanova jáne qyzmetkerleri qatysty.
-Búgin men osyndaı ádemi ǵımaratta sizdermen qaýyshqanyma qýanyshtymyn. Mundaı keremet ǵımaratta jumys jasaý – sizder úshin de, bizder úshin de úlken mártebe. Osy ýaqytqa deıin elimizdiń barlyq óńirindegi Dostyq úılerin aralap, etnomádenı birlestik ókilderiniń usynystaryn, ıdeıalaryn tyńdadym. Árıne, búgingi kezdesý resmı emes, jáı erkin formattaǵy kezdesý dep bilińizder. Sondyqtan búgingi kezdesýde sizderdiń Assambleıany damytý maqsatynda usynystaryńyzdy, jańa ıdeıalaryńyzdy, tipti úlken aýqymdy jobalaryńyz bolsa, múmkin jumys barysynda týyndap júrgen, sheshimin taba almaı júrgen máseleler bolsa tyńdaýǵa daıynmyn. Aldaǵy ýaqytta sizderdiń sol usynystaryńyz ben keńesterińiz Qazaqstan halqy Assambleıasynyń qyzmetin jandandyrýǵa kómektesedi degen oıdamyn, dedi Sherzod Abbozuly.
Kezdesý barysynda QHA qyzmeti men aldaǵy josparlar týraly máseleler talqylanyp, etnomádenı birlestik tóraǵalary tarapynan usynystar aıtylyp, keńester berildi. Sherzod Abbozuly men etnomádenı birlestik tóraǵalary arasynda konstrýktıvti qarym-qatynas ornady.
Sonymen qatar Sherzod Abbozuly kelesi jyly Qazaqstan halqy Assambleıasynyń 25 jyldyǵy, Elbasy N.Nazarbaevtyń 80 jyldyǵyna oraı uıymdastyrylatyn is-sharalardyń joǵary deńgeıde ótýine at salysý kerektigin tilge tıek etti.
Kezdesý sońynda oblystyq Assambleıa hatshylyǵynyń meńgerýshisi G.Ismýrzına Sherzod Abbozulyn byltyr paıdalanýǵa berilgen jańa Dostyq úıiniń úsh qabatyn da (konsert zaly, konferens-zal, kınozal, ashana, kórme zaly, t.b.) aralap, tanystyrdy.
Qazaqstan halqy Assambleıasy tóraǵasynyń orynbasary Sh.Pýlatov oblystyq QHA hatshylyq meńgerýshisi G.Maqsutqyzyna, «Qoǵamdyq kelisim» KMM basshysy A.Jaıylhanovaǵa, etnomádenı birlestik tóraǵalaryna alǵys bildirip, jumystaryna sáttilik tiledi.
Mańǵystaý oblysy
