Qalamgerdiń rýhyn aspandatqan aıtýly sharaǵa Reseıden týǵan-týystary men jubaıy arnaıy keldi. Jınalǵandar jyly estelikterimen bólisip, qabyrǵaly qalamgerdiń azamattyq tulǵasyn tebirene eske aldy. Ásirese, ákesiniń atyna kóshe buıyrǵany qyzy Irına Belgerdi aıryqsha qýantypty. Sebebi, qazir ol Gerold Belgerdiń qoljazbalaryn, jeke zattaryn jınastyryp, murajaıǵa ótkizýdi qolǵa alǵan. «Ákemizdiń ómirden ozǵanyna bes jylǵa jýyqtady. Qazir qolymyzdan kelgenshe onyń esimin urpaq sanasynda áldıleý úshin estelikter jınastyrý ústindemiz. Qolymyzda kóptegen qoljazbalary bar. Olardy retke keltirýdi kózdep otyrmyz. Ákem ulty nemis bolsa da qazaq halqyn erekshe súıdi, sońǵy demi qalǵansha ádebıeti men rýhanııatyna qaltqysyz qyzmet qyldy», – deıdi Irına Belger.
Jazýshynyń qyzy tilge tıek etkendeı, sanaly ǵumyrynyń sáýleli sátterin ádebıet álemine baǵyshtaǵan Belgerdiń qazaq halqyna degen mahabbaty shyǵarmalary arqyly kóptep kórinis tabady. Oǵan jazýshynyń «Abaı ı Gete» zertteý eńbegindegi: «Meniń Abaıdy tanýym Geteni túsinýden bastalýǵa tıis syqyldy edi. Qanshama qazaqsha oqyp, qazaq aýylynda óstim degenmen, nemis emespin be? Biraq bári kerisinshe bolyp shyqty. Men áýeli Abaı arqyly Geteni taptym. Bul ánsheıin aıtyla salǵan jyltyraq sóz emes. Basqasyn bylaı qoıǵanda, Geteniń áıgili «Jolaýshynyń túngi jyry» atty óleńin men áýeli Abaıdyń «Qarańǵy túnde taý qalǵyp» degen óleńin oqyp baryp, Lermontovtyń «Taý shyńdary» arqyly boıyma sińirippin», degen joldary dálel.
Daryn atyndaǵy dańǵyldyń resmı ashylý saltanatyna jınalǵan zııaly qaýym ókilderi de onyń qazaqtyń qasıetti saltyn óte tereń biletinin, shyǵarmalary halyqqa birtaban jaqyn ekenin aıtyp, Belgerdiń jazýshylyq qyry men azamattyq syry týraly tereńnen tolǵady.
Almatynyń Naýryzbaı aýdanynda sońǵy eki jylda 100 kóshe jańa ataý enshilegen. Buǵan deıin elimizdiń eki birdeı iri qalasynda jazýshynyń atyna kóshe ataýy berilgen bolatyn.
