Bul otbasy týraly áńgime qozǵaǵanda eki múshel jasynda qapııada qaza tapqan Ǵazızdiń esimi til ushyna aldymen oralary zańdy. Jastyqtyń alaý oty boıynda jalyndap, qoǵam tynyshtyǵyn saqtaýdaǵy mazasyz qyzmetin bastaǵan ol ómirdiń aýyr taýqymetin kóp kórdi. Áke-sheshesinen jastaıynan aıyrylyp, úlken aǵasynyń baýyrynda ósti. Segizinshi synypty aıaqtaǵannan keıin kóp oılanbastan óndiriske aralasýǵa, sóıtip shyńdalý mektebinen ótýge sheshim qabyldady. Otan aldyndaǵy azamattyq boryshyn ótep kelgen soń komsomoldyq joldamamen Petropavl qalalyq ishki ister bólimine mılısıoner bolyp ornalasty. Á degennen óz isine jaýapty, ýádege berik, joldastyq-dostyqqa adal qasıetterimen daralanyp, qylmyspen kúreste, aldyn alýda, boldyrmaýda basyn talaı qaterge tikti. Únemi alǵy shepte júrdi. Otan degen asyl uǵymdy kóziniń qarashyǵyndaı qadirleı bildi. Marqumnyń kóp armandarynyń biri oqýyn jalǵastyrý, úlgili otbasyn qurý edi. Alaıda taǵdyr oǵan jazbady. Oıda-joqta qaskúnemderdiń qolynan ajal qushty. 1951 jyldyń 21 maýsym kúni jaryq kúnmen máńgilikke qoshtasaryn bilmegen. Patrýldik top quramynda keshqurym jurtshylyq jıi jınalatyn demalys saıabaǵyna kezekshilikke barǵan. Bir-birimen kúlimdeı amandasyp, alańsyz serýendep júrgen adamdardyń túngi tynyshtyǵyn áldebir jandardyń ashy daýsy buzyp, aınalany jańǵyryqtyryp jibergen. Oqıǵa ornyna ile-shala jetkeni sol edi, ishimdikke esirip, aqyl-esin joǵaltqan eki áskerı adam bı alańynda júrgenderdi qýalap, soqqynyń astyna alyp júrgenin qyraǵy kózi birden shalǵan. Dereý bireýin jerge jyǵyp, keri qaıryla bergende ekinshisi munyń moıyn tusyna ótkir kezdikti boılata suǵyp jibergen. Qan saýlap qoıa berse de et qyzýymen baıqamaǵan. Ádis qoldanyp, ony da yrqyna kóndire bergende kómek toby jetip úlgirgen. Biraq bári kesh edi. Jedel járdem kórsetilgenine qaramastan aýrýhanaǵa jetpegen kúıi aqtyq demi úzilip ketken. Sodan beri arada jetpis jylǵa jýyq ýaqyt ótse de qyzmettik boryshyn óteý kezinde qapylysta mert bolǵan oǵlannyń esimi eskerýsiz qalǵan emes. Únemi jas býynǵa úlgi etilip, erlik isteri keńinen nasıhattalyp keledi.
–Keńeske 2240 ardager múshe. Olardyń 5-ýi– fashıstik Germanııaǵa qarsy qaharmandyqpen shaıqassa, 28-i– tyl eńbekkeri. Qaı-qaısysynyń da qoǵamdyq tártiptiń qaýipsizdigin qamtamasyz etýge qosqan úlesi zor. Ártúrli dárejedegi memlekettik marapattarmen atap ótilgen. Djýra Kobelev degen maıdangerimiz jýyrda 102 jasqa toldy. Sońǵy eki jylda 128 ardagerimiz sanatorıılerde, jergilikti áskerı gospıtalda em-dom alyp, tynyǵyp qaıtty.
Al Ǵazızge arnalatyn is-sharalardyń orny bólek. Departament ǵımaraty qabyrǵasynda memorıaldyq taqta ornatylǵan,–dedi oblystyq polısııa departamenti janyndaǵy ardagerler keńesiniń tóraǵasy Suraǵan Kópeev.
Osydan eki jyl buryn ishki ister organdary jas polıseılerdiń respýblıkalyq sleti Qyzyljar óńirinde ótkende erlikpen qaza tapqan tártip saqshysynyń qurmetine arnaıy alleıanyń taspasy qıylyp, saltanatty túrde ashylypty. Shyrsha kóshetteri otyrǵyzylypty. Qazir bul jer urpaqtar arasyndaǵy sabaqtastyqty jetildirýdiń, ozyq dástúrlerdi jańǵyrtýdyń, jaýyngerlik rýhty qasterleýdiń sımvoldyq belgisi, jarqyn úlgisi ispettes. Oqýshylar ekskýrsııasy, jumysqa ornalasqan jas qyzmetkerler osynda kelip, aǵash egý, gúl shoqtaryn qoıý sekildi tanymdyq, taǵylymdyq aksııalar júıeli túrde uıymdastyrylyp turady.
Osy áýlettiń qadirmendi bir múshesi Bolat Ǵafızulynyń da sanaly ǵumyry ishki ister organymen tyǵyz baılanysty. Eńbek jolyn aýdandyq ishki ister bóliminen bastap, oblystyq kóshi-qon qyzmeti bastyǵynyń orynbasaryna deıin kóterilgen. О́ńirde osy salanyń damýyna, nyǵaıýyna súbeli úlesin qosqan. Jan jary Alma Japarqyzy da qalalyq ishki ister bóliminiń keńsesinde qyzmet atqarǵan. Olardyń uldary Bahtııar ata, áke soqpaǵyn jalǵastyrýdy maqsat etip, tańdaýdan qatelespegen. Ishki ister mınıstrligi janyndaǵy akademııany támamdaǵannan keıin týǵan jerge oralǵan. Qazir Qyzyljar aýdandyq ishki ister bólimi bastyǵynyń orynbasary. Polısııa maıory.
Kelinshegim Anar da qalalyq ishki ister bóliminde biraz jyl eńbek etti. Bárin qosyp eseptesek, áýletimizdiń jalpy jumys ótili jarty ǵasyrdan asyp ketedi. Ulymyz Ámir jeti jasta. Meniń jolymdy qýyp jatsa, qýanbasam, renjimeımin. О́ıtkeni áýletimizdiń ushar basynda turǵan atamyzdy bárimiz eren erliktiń óshpes eskertkishi, temirqazyǵy sanaımyz, deıdi Bahtııar Bolatuly tártip saqshysyna tán nyq, sergek únmen.
Soltústik Qazaqstan oblysy
