Jıyn barysynda «Astana jastary» jastar resýrstyq ortalyǵynyń basshysy Chıngız Maratuly atalǵan joba elordada tuńǵysh ret uıymdastyrylyp otyrǵanyn jetkizdi.
«Meıkaton jobasy respýblıkada birneshe ret uıymdastyrylǵanymen Nur-Sultan qalasynda tuńǵysh ret ótkeli otyr. Sonymen qatar «Astana jastary» jastar resýrstyq ortalyǵy Nur-Sultan qalalyq ákimdiginiń qoldaýymen, «Qazaqstandaǵy Tel-Avıv ýnıversıtetiniń dostar qaýymdastyǵymen» kelisimshartqa otyrǵan bolatyn», dedi ol.
TOM: Nur-Sultan meıkaton marafony búgin bastaý alady, onda 3,5 kún boıyna múmkindigi shekteýli jandardyń ómirlerin jeńildetýge arnalǵan prototıpter jasalady. Meıkaton jobasy Nazarbaev Ýnıversıtetiniń Innovasııalyq klasteriniń «Fab Lab» zerthanasynyń alańynda ótedi. Bul ýnıversıtet Nur-Sultan qalasyndaǵy aldyńǵy qatarly ýnıversıtetterdiń biri bolyp tabylady jáne ınnovasııalyq keń aýqymdy is-shara formatyn ótkizýge tehnıkalyq jáne materıaldyq bazasy, jobany ótkizýge múmkindik beredi.
«Meıkaton – jas ónertapqyshtar men múmkindigi shekteýli jandardyń bas qosatyn alańy deýge bolady. Jáne sol ónertapqyshtardyń jasaǵan qurylǵylary men jobasy múmkindigi shekteýli jandardyń qalypty ómir súrýine yqpal etedi. Biz bul jobany Qazaqstanda iske asyrýdy 2017 jyly zerthana júzinde qolǵa alǵan bolatynbyz. Atalǵan jobanyń ákimdikter tarapynan qoldaý tapqanyna qýanyshtymyz. Pavlodar qalasynan bastaý alǵan marafon Qaraǵandy, Almaty, Aqtaý, Shymkent qalalarynda jalǵasqan bolatyn. Máselen, byltyr ótken meıkatondarda meıkerler sýrdo-aqparatty daýystap jetkizetin «Aqyldy qolǵap», múgedekterdiń aıaqqa turyp ketýine arnalǵan ekzoqańqa, nashar estıtinderge turmystyq jaǵdaılardy baǵdarlaý úshin bilezik jáne taǵy basqalaı paıdaly qurylǵylar usynǵan. Tipti qos janarynan aıyrylǵan zaǵıp jandarǵa arnaıy taıaq ta oılap taýyp, qurastyrylypty. Bul qurylǵy olarǵa kóshede oı-shuńqyr nemese joldaǵy túrli kedergilerdi jarty metr qalǵanda dybystyq belgi berip, eskertedi eken. Bıyl aýqymdy jobany ótkizý úshin Nazarbaev ýnıversıtet ınnovasııalyq klasteriniń «Fab Lab» sıfrly prototıpteý zaly úsh kúnge zerthanaǵa aınalyp, meıkerler óz ıdeıalaryn júzege asyrady. О́ıtkeni atalǵan zal túrli tehnologııalyq zerttemeler júrgizýge arnalǵan zamanaýı qural-jabdyqtarmen qamtylǵan» dedi «Qazaqstandaǵy Tel-Avıv ýnıversıtetiniń dostar qaýymdastyǵy» ZTB vıse-prezıdenti Sanııa Arapova.
Úzdik ıdeıalaryn usynǵan 7 komanda birinshi kezeńnen ótti jáne ekinshi kezeńde ózderi usynǵan ıdeıalar boıynsha jumys isteýge múmkindik aldy. Olardyń ishinde GEAR UP – «Mehanıkalyq kolıaskalardy modernızasııalaý. Elektrondy qondyrmalar men besinshi dóńgelekterdi qosý», CHAIN – «ChainStep – baldaq jáne muzǵa qarsy aıaq kıim», NUKBTU – «TyndApp – zaǵıptarǵa arnalǵan qosymsha. Qoǵamdyq kólikpen sınhrondaý (astrabus/citybus), Braıl negizindegi dybystyq júıeni úıretý», KEEP GOING – «Múgedekter arbalaryna arnalǵan elektr qondyrǵysy», HEALTHOCRACY – «Múgedek sportshylardyń aıaqtaryn bulshyq etterin jylytýǵa arnalǵan ellıps jattyqtyrýshysy», DEUX EX MACHINE – «Qoljetimdi qalpyna keltirý jattyǵýy velosıpedi. «Sal aýrýy bar aıaq-qoldardyń bulshyq etin jáne býyndaryn damytý úshin velosıpedti pedalızasııalaý qaǵıdatyna negizdelgen qalpyna keltirý apparaty», JÁRDEM – «Qosymsha mýltıfýnksıonaldy opsııalarmen elektr kolıaskasyn jaqsartý» jobasy bar.
Eki kezeńde de komandalarǵa nıdnoýerlerden jáne prototıpterdi arnaıy jasap jatqan múmkindigi shekteýli jandar tarapynan keńester berilgen. Nıdnoýer-keńesshilerdi irikteýde «Qazaqstan múgedekter konfederasııasy» respýblıkalyq qoǵamdyq qaýymdastyǵynyń atqarýshy dırektory Alma Qýandyqqyzy jáne «Qazaqstan múgedekter konfederasııasy» respýblıkalyq qoǵamdyq qaýymdastyǵynyń atqarýshy dırektorynyń orynbasary Aleksandr Horkın myrzamen birlese jumys atqarylǵan.
Atalǵan sharany «Astana jastary» jastar resýrstyq ortalyǵy, Nazarbaev Ýnıversıtettiń Innovasııalyq klasteriniń Fab Lab zerthanasy jáne Qazaqstandaǵy Tel-Avıv ýnıversıtetiniń dostary qaýymdastyǵy uıymdastyryp otyr. «Meıkaton TOM: Nur-Sultan» jobasy Jastar jyly aıasynda Nur-Sultan qalasy ákimdiginiń qoldaýymen júzege asyrylýda.
