Kezdesý barysynda Prezıdenttiń «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty halyqqa Joldaýynda qoıylǵan mindetterdi júzege asyrý týraly aıtty.
Vıse-premer Prezıdenttiń tapsyrmasy boıynsha pedagogtardyń mártebesin arttyrý, olardy materıaldyq qamtamasyz etý deńgeıin jaqsartý jáne bilim berý salasynyń basqa da máseleleri sheshiletindigin atap ótti. Tıisti zań jobasy Parlamentte qaralýda.
«Árbir eldiń damýy bilim, densaýlyq saqtaý, azamattardyń mádenıetine baılanysty. Bizdiń balalarymyzdyń halyqaralyq standarttarǵa sáıkes sapaly bilim alýy mańyzdy. Sondyqtan biz muǵalimderdiń mártebesin, olardyń materıaldyq qamtamasyz etilýin arttyrýymyz kerek. Memleket basshysynyń tapsyrmasy boıynsha 4 jyl ishinde muǵalimderdiń jalaqysy eki esege artady. Keleshekte bizdiń muǵalimder men dárigerlerdiń jalaqysy el boıynsha ortasha jalaqydan joǵary bolýy tıis», - dep atap ótti B.Saparbaev.
Sondaı-aq vıse-premerdiń pikirinshe, mektep dırektorlarynyń jalaqysy sapaly kórsetkishterge baılanysty bolýy tıis.
«Mysaly, bul mektepte 4000 bala, al kórshi mektepte 500 bala oqıdy. Júkteme ártúrli, al dırektorlardyń jalaqysy birdeı. Sondaı-aq oqý sapasy - «Altyn belgi» alatyn túlekteri sany, tártibi jáne basqa da kórsetkishter eskerilmeıdi. Bul máseleler jańa zańda eskeriletin bolady», - dedi vıse-premer.
Berdibek Mashbekuly muǵalimderdi jas urpaqqa rýhanı-adamgershilik tárbıe berý boıynsha jumysty kúsheıtýge shaqyrdy.
«О́kinishke oraı, sońǵy ýaqytta jasóspirimder arasynda sýısıdter men quqyq buzýshylyqtar sany ósýde. Bul ata-analar men muǵalimderdiń ózara is-qımylynyń nasharlaǵanyn kórsetedi. Bul máseleni sheshýde biz qoǵam men memlekettiń kúsh-jigerin úılestirý úshin qoǵamnyń nazaryn osy máselege aýdarǵymyz keledi. Laıyqty urpaqty tárbıeleý - bizdiń ortaq mindetimiz», - dedi Berdibek Mashbekuly.
