Eske sala keteıik, ótken aptada Dúnıejúzilik bank Doing Business bıznes júrgizýdiń jeńildigi boıynsha jyl saıynǵy reıtıngti jarııalady, onda Qazaqstan 28-den 25-orynǵa deıin 3 tarmaqqa kóterilgen.
J. Mádıevtiń aıtýynsha, Qazaqstan 3 pozısııaǵa joǵarylap, álemniń 190 eliniń arasynda bıznesti júrgizý boıynsha TOP-25 eldiń qataryna kirdi, bul Úkimettiń jyldan jylǵa bıznesti damytý úshin qolaıly jaǵdaı jasaýǵa baǵyttalǵan sharalarynyń áreketti bolyp kelgenin kórsetti.
Qazaqstan 79,7 baly bar Germanııadan keıin yqtımal 100 baldyń 79,6 balyna ıe boldy. Qazaqstan Avstrııadan, Japonııadan, Ispanııadan, Fransııadan, Shveısarııadan jáne TMD elderinen ozdy.
Sonymen qatar J. Mádıev 2016 jyly «Nur Otan» partııasynyń XVII sezinde 2021 jylǵa qaraı «Doing Business» reıtınginiń TOP-25 eliniń qataryna kirý mindeti qoıylǵanyn eske saldy. Búginde, osy mindet 2019 jyly oryndaldy.
«Baldar sany boıynsha biz 79,6 ball alǵan Kanada jáne Irlandııamen teń pozısııadamyz. Olar reıtıngde 23 jáne 24-oryndarǵa ıe», — dedi J. Mádıev.
Sońǵy eki jylda Qazaqstan 11 pozısııaǵa joǵarylady (2017 jyly – 36-oryn, 2018 jyly – 28-oryn). Bul Úkimettiń 2014 jyldan bastap zańnamalyq bastamalardyń 7 toptamasy sheńberinde qabyldanǵan reformalarynyń rekordty nátıjelerin kórsetedi.
Reıtıngtiń nátıjelerine sáıkes Qazaqstan 10 negizgi baǵyttyń 3-ýi boıynsha joǵarylady jáne «Sharttardyń oryndalýyn qamtamasyz etý» ındıkatory boıynsha álemdegi tórtinshi ornyn saqtap qaldy.
Qazaqstan «Kredıt alý» (+35 pozısııa), «Kásiporyndardy tirkeý» (+14 pozısııa), «Elektrmen jabdyqtaý júıesine qosylý» (+9 pozısııa) ındıkatorlary boıynsha aıtarlyqtaı ósim kórsetti.
Qazaqstan iske asyrǵan negizgi reformalar:
«Astana-1» elektrondyq kedendik deklarasııalaý júıesin engizý;
Qosymsha qun salyǵyn tirkeý ýaqyty 5-ten 1 jumys kúnine deıin qysqardy;
Zańdy tulǵalardyń paıdasyna qaraı óteý týraly sot aktisin oryndaýǵa ýaqyt shyǵyny 231 kúnnen 64 kúnge qysqartyldy;
Tapsyrys berýshide jer ýchaskesine quqyǵy bolǵan jaǵdaıda jergilikti atqarýshy organdardan qurylysqa qosymsha ruqsat alý qajettiligi alyp tastaldy;
Shotty onlaın ashqannan keıin bankke barý qajettiligi alyp tastaldy, bul kompanııalarǵa shotty ashqan sátten bastap ony qashyqtyqtan paıdalanýǵa múmkindik beredi;
«Sot kabıneti» servısi sheńberinde úıden nemese keńseden shyqpaı sotqa talap aryz (shaǵym, ótinish, pikir, qarsy talap aryz nemese ótinish) berý jáne onlaın rejımde memlekettik baj tóleý múmkindigi usynylǵan.
Bul rette, zańnamalyq bastamalardyń ázirlenip jatqan 8-toptamasy sheńberinde mynalar usynylady:
Elektr jelilerine qosylý boıynsha «Bir terezeni» engizý;
QQS tóleýshisi retinde tirkeý bir kúnniń ishinde elektrondyq ótinim boıynsha ǵana jasalady;
HQKO-ǵa kelmeı jeke kabınette kompanııanyń elektrondyq sıfrlyq qoltańbasyn alý;
JShS músheleri arasynda daýlardy (tyǵyryqty jaǵdaılardy) sheshý tetigin engizý;
Elektr jelilerine qosylýǵa ótinishti elektrondyq túrde berý júıesin engizý;
QMJ bastaǵany týraly MSQB basqarmasyna jáne jol polısııasyna habarlama berý rásimin alyp tastaý;
Sáýlet-josparlaý tapsyrmasy, topografııasy jáne tehnıkalyq sharttary bar jer ýchaskelerin berý;
Táýekeli tómen qurylys jobalaryn mindetti saraptamadan alyp tastaý.
«Qabyldanyp jatqan sharalar kásipkerlik áleýetti ashýǵa, bıznes ahýaldy qalyptastyrýǵa múmkindik beredi. Iskerlik ahýaldy jaqsartý shaǵyn jáne orta kásipkerliktiń ósýin qamtamasyz etedi, bul eldiń ekonomıkalyq ósýine jáne halyqtyń ál-aýqatynyń jaqsarýyna járdemdesedi», — dedi vıse-mınıstr.
Kásipkerlik qyzmet jónindegi zańnama 2014 jyly Kásipkerlik qyzmetti memlekettik retteý tujyrymdamasyn, al 2015 jyly Kásipkerlik kodeksti qabyldaı otyryp reformalanǵan bolatyn. Sonymen qatar, 5 jyl boıy «Doing Business» reıtıngi sheńberinde bıznesti damytý úshin qolaıly jaǵdaı jasaýǵa baǵyttalǵan zańnamalyq bastamalardyń 7 toptamasy qabyldandy.
«Biz osymen toqtap qalmaımyz, bizdiń órshil maqsatymyz – Qazaqstanda bıznes úshin eń úzdik jaǵdaıdy jasaý jáne “Doing Business” reıtınginiń TOP-20 úzdik elderiniń halyqaralyq baǵasyn alý», — dep túıindedi Ulttyq ekonomıka vıse-mınıstri Jaslan Mádıev.
