Ǵalym: «Sasyqsaı» o basta 24 myń tekshe metr suıyq jınaýǵa arnalǵan edi, qazir kásiporyndardan táýligine 60 myń tekshe metr sarqyndy quıylady. Ýly zattardyń qorymyna aınalǵan polıgon aýmaǵy 8 ese ulǵaıdy», deıdi.
Ataýynyń ózi kóp nárseden habar beretin bul býlaný alańynyń jabylatyny týraly oblys ákimi Nurlan Noǵaev halyqqa esep berý jıynynda aıtqan edi. Qalanyń sol jaq jaǵalaýynda salynyp jatqan káriz tazartý júıesi qurylysynyń aıaqtalýyn atyraýlyqtar asyǵa kútip júr. 2017 jyly bastalǵan keshen qazir aıaqtalyp keledi. Aldaǵy jyly iske qosylýǵa tıis.
Keshen quramyndaǵy negizgi káriz aıdaý stansasyn, tazalanbaǵan aǵyndy sýlardyń qondyrǵysyn, bıologııalyq kólder men býlaný alańdarynyń qurylysyn teksergen oblys ákimi Nurlan Noǵaev bul jobanyń óńirdiń ekologııalyq qaýipsizdiginde mańyzy zor ekenin atap ótti. Jańa keshenniń ereksheligi – aǵyndy sýdy tazartady, al taza sý kózderi jer qabattary men jerasty sýlarynyń lastanýyna jol bermeıdi. Tazarǵan sýdy sharýashylyq maqsatqa qaıtadan paıdalanýǵa da bolady. Oblystyq qurylys basqarmasynyń basshysy Málik Amanovtyń sózine súıensek, jańa nysannyń qýatyn táýligine 100 myń tekshe metrge deıin jetkizý josparlanǵan.
Oblystyq Ekologııa departamentiniń basshysy Abaı Safınniń aıtýynsha, 2021 jyldan bastap «Sasyqsaıǵa» las sý aǵyzý toqtatylyp, aýmaǵy qalpyna keltiriledi. Býlandyrý alańyn rekýltıvasııalaý jumysynyń basym bóligin «Atyraý munaı óńdeý zaýyty» júzege asyrady. Jańa keshen oblys ortalyǵynyń sol jaq bóliginiń káriz sýyn tazartady. Bolashaqta oń jaǵalaýdan da osyndaı keshen boı kóteredi, qazir osy maqsatta jobalaý jumystary júrip jatyr. «Bul qorshaǵan ortany qorǵaýǵa, aýa tazalyǵyn saqtaýǵa oń yqpal etedi», deıdi óńirdiń bas ekology. 1978 jyly salynyp, sodan beri birde bir ret kúrdeli jóndeý júrgizilmeı, ábden tozyǵy jetip turǵan «Sasyqsaıdyń» dáýreni osymen aıaqtalady.
Jyl basynan beri qala aýmaǵynda ornalasqan NKOK kompanııasynyń stansalarynan jáne Atyraý munaı óńdeý zaýytynyń sanıtarlyq-qorǵanys aýmaǵynan aýany lastaýǵa qatysty 514 derek tirkelgen. «Ásirese «Sasyqsaıdyń» janyndaǵy «Vest oıl» stansasynda atmosferalyq aýanyń óte kóp lastanǵany anyqtaldy. Saraptama jumystarynyń nátıjesinde lastaný kózi káriz sýlary quıylatyn býlaný alańy ekeni anyqtaldy», deıdi Abaı Safın.
«Qazgıdromettiń» monıtorıngtik baqylaýy nátıjesinde jasalǵan aýasy eń las qalalar tizimin bıylǵy birinshi jartyjyldyqta Aqtóbe bastap, Qaraǵandy, Nur-Sultan qalalarynan keıin Atyraý jalǵastyrǵan. Munaıly aımaqta birinshi sanattaǵy qaýipti kásiporyndar sany 147-ge jetti. Bul qorshaǵan ortany qorǵaý sharalaryn áli de jetildire túsý kerektigin kórsetedi. Al keler jyldan bastap iske qosylatyn jańa káriz sýyn tazartý júıesi Atyraýdyń las aýasyn tazartady degen úmit bar.
ATYRAÝ
