Tamshy-taǵdyr
Ramazan aıy. Yp-ystyq jas domalap barady.
Arnasyna syımaı, tolqyny birde kókke shapshyp, jaǵaǵa soǵylyp, alasuryp jatatyn taǵdyr-teńiz máńgilikke tynshyǵan. Endi bir sát jan tynyshtyǵy buzylǵandaı.
Arpalys... Esik-terezeni urǵylyp, jantalasqan onyń áreketi úreı týǵyzǵan-dy.
- Balam, tez, polısııaǵa habarlasshy, - degeni sol, muzdaı kıingen eki adam kóterip áketti.
Anasy shoshyp oıandy. Myń batpan oı men muńǵa batqan janaryn jasyrǵan qalpy: «Ákeń túsime kirdi, basyna baryp, quran baǵyshtarsyń», - dedi.
Juma namazynyń ýaqytynda qońyraý shalǵan ulynyń úni qulaǵyna túrpideı tıdi:
- Apa, ákemniń qabiri túgel opyrylyp, tómen túsip ketipti.
- Meshitke habarlasyp, ımamdarmen aqyldas, ne deıdi eken...
...Kezek-kezek oqylǵan quran súreleri eki dúnıe arasyn jalǵap turǵandaı, jan-júıesin shymyrlatty. Kózin jumǵan sátte býaldyr beıne baıaý qalyqtap ushyp baryp, kókjıekke sińgendeı ǵaıyp bolǵan.
Jańa ǵana úıilgen topyraq betine kirpiginen úzilip túsken bir tamshynyń alaqanynda izi qaldy...
Bir tamshy jas... Taǵdyr...
Duǵa
О́mir qaterinen ana duǵasy aman alyp keledi.
Jatsa-tursa Allany aýzynan tastamaı, kúbirlep júretin ádeti. «Adamnan suraǵannyń eki kózi shyǵady, Alladan suraǵannyń eki búıiri shyǵady». Bul da ana sózimen qulaǵyna quıylǵan támsil.
«E, Jaratqan ıem, anamnyń denine saýlyq bere gór, men áli paryzymdy óteı almadym...». Armanyn Allaǵa sybyrlap aıtady, anasy bárin-bárin sezedi. Estıdi...
Gúlbaqyt Qasen
