Otyrys jumysyna Mańǵystaý oblysy ákiminiń orynbasary Qanybek Jumashev, «Áleýmettik saqtandyrý medısınalyq qory» KEAQ Basqarma tóraǵasynyń orynbasary Erık Baıjúnisov, aýdan jáne qala ákimderiniń orynbasarlary, Mańǵystaý oblystyq densaýlyq saqtaý basqarmasyna qarasty mekeme basshylary qatysty.
Otyrysta alǵashqy bolyp sóz alǵan oblys ákiminiń orynbasary Qanybek Jumashev, elimizde mindetti áleýmettik saqtandyrý júıesin engizilýine eki aı ýaqyt qalǵandyǵyn tilge tıek etti. Sol sebepti medısına salasynyń ókilderi bas qosyp, daıyndyqty pysyqtap alý qajettigi týyndap otyr.
Sodan keıin sóz alǵan «Áleýmettik saqtandyrý medısınalyq qory» KEAQ Basqarma tóraǵasynyń orynbasary Erık Baıjúnisov, turǵyndar arasynda aqparattyq-túsindirý jumystaryn áli de bolsa keńinen júrgizý qajettigin alǵa tartty.
- Aımaqtarda qurylǵan shtab jumysynyń negizgi basym baǵyttary árbir turǵyndy qamtı otyryp, tolyqqandy aqparattyq-túsindirý jumystaryn keńinen júrgizý bolyp tabylady. Medısınalyq saqtandyrýdyń árbir aspektisi keńinen túsindirilse ǵana, belgili bir nátıjege qol jekizýge bolady. Sondyqtan da osy jumystardy áli de bolsa jandandyra túsý qajet, dedi ol.
Sonymen qatar óńirdegi medısınalyq mekemelerdiń mindetti áleýmettik saqtandyrý júıesin engizý daıyndyǵy týraly oblystyq densaýlyq saqtaý basqarmasynyń basshysy Ánýar Saǵymbaev baıandama jasady.
Onyń aıtýynsha, júrgizilip jatqan reformalardy sapaly júzege asyrý úshin qala men aýdandarda, aqparattyq jumys bekitilgen óńirlik kommýnıkasııalarǵa sáıkes júrgizilýde. Tegin kepildendirilgen medısınalyq kómek sheńberinde 51 medısınalyq uıymdarmen, (onyń ishinde 25 jekemenshik) 71 kelisim shart jasaqtalyp, jalpy ónimberýshiler ishinde jekemenshik ónimberýshilerdiń úlesi 46,3%-dy qurady. Jekemenshik ónimberýshilerdi qarjylandyrýǵa 2 795 000 mln teńge bólinip otyr.
Mindetti áleýmettik saqtandyrý júıesin engizý baǵytynda jumystar jalǵasyn tabady. Barlyq memlekettik organdar, qala jáne aýdandyq ákimdikter azamattardy formalızasııalaý, medısınalyq jáne áleýmettik saqtandyrý, zeınetaqymen qamsyzdandyrýdy júıelerine tartý, ózin-ózi jumyspen qamtyǵan adamdar sanyna qosý, jarnalardyń saqtandyrý qoryna túsýin júıelendirýge baǵyttalǵan sharalardy oryndaý tapsyryldy.
