Konferensııa jumysyna elimizdiń aldyńǵy qatarly ǵylymı jáne klınıkalyq ortalyqtarynyń jetekshileri, Belarýs, Belgııa, Ulybrıtanııa, Germanııa, Grýzııa, Izraıl, Ispanııa, Italııa, Úndistan, Qyrǵyz Respýblıkasy, Qazaqstan, Reseı, AQSh, О́zbekstan, Ýkraına, Tájikstan, Túrkimenstan, Chehııa men Japonııanyń reprodýktıvti tehnologııa salasyndaǵy jetekshi mamandary – akýsher-gınekolog dárigerler, EKU ortalyqtarynyń ókilderi, andrologtar, endokrınologtar, bedeýlikti emdeıtin mamandar, embrıologtar, genetıkter men molekýlıarlyq bıologtar keldi.
Forýmnyń ashylýynda Densaýlyq saqtaýdy damytýdyń 2020-2025 jyldarǵa arnalǵan memlekettik baǵdarlamasynyń basymdyqtary usynyldy.
Ekikúndik konferensııa aıasynda Úndistan, Izraıl, Ispanııa, Italııa, Germanııa, Reseı, Ýkraına, Japonııa men Qazaqstannyń mamandarynyń qatysýymen QRT-daǵy embrıologııa, akýsherlik jáne gınekologııanyń eń ózekti máseleleri boıynsha sheberlik synyptary ótedi.
Bedeýliktiń damýyna ákeletin aýrýlardyń aldyn alý máseleleri, bedeý nekeni dıagnostıkalaý men emdeýdegi AMSK róline basty nazar bólinedi.
Aýqymdy jıynnyń kún tártibinde QRT ortalyqtarynyń klınıkalar jáne jalpy tájirıbeli dárigerlermen, ýrolog-andrologtarmen, genetıktarmen ózara jumys isteý máseleleri aldyńǵy qatarǵa shyqty. Atalmysh másele bedeýlikke shaldyqqan erli-zaıypty juptardy erte dıagnostıkalaý men ońtaıly emdeý boıynsha keshendi jumysty uıymdastyrý úshin anyqtaýshy mánge ıe.
Áleýmettik ádildikti jáne áleýmettik osal toptarǵa qoldaý kórsetýdi esepke ala otyryp, TMKKK sheńberinde baǵdarlamalardy bólý máselelerine erekshe nazar bólý josparda bar.
Kongress holldarynda reprodýktıvti medısınaǵa arnalǵan kórme ashylyp, oǵan dárilik quraldar men medısınalyq tehnıkanyń 40-taı óndirýshileri, sonymen birge QR-da tanymal QRT klınıkalary qatysyp otyr.
Konferensııa taqyrybynyń ózektiligi sonda – bedeý neke máselesiniń sheshilýi eldegi demografııalyq jaǵdaıdy jaqsartýǵa jáne túrli sebepterge baılanysty bala súıe almaıtyn jandardyń ómir súrý sapasyn jaqsartýǵa múmkindik beretin medısınalyq-áleýmettik másele ekendiginde bolyp tur. Bedeýliktiń jıiligi ortasha alǵanda 15 paıyzǵa teń jáne jaqyn arada bul kórsetkish tómendemeıdi. Dıagnostıkalaýdyń zamanaýı ádisteriniń damýy bedeýliktiń negizgi sebepterin jetkilikti deńgeıde dál tabýǵa jáne ony emdeýdiń ádisterin anyqtaýǵa múmkindik beredi. Jaǵdaılardyń 40 paıyzyna jýyǵynda bedeýlik erlerdiń reprodýktıvti júıesindegi patologııamen baılanysty. Al 30 paıyzy – aralas bedeýlik (erler jáne áıelder bedeýligi).
Sońǵy ondaǵan jylda álemde bedeýliktiń túrli formalaryn emdeýde úlken tájirıbe jınaldy. Qazirgi kezde bar tásilderdiń kóbi Qazaqstanda oıdaǵydaı engizilgen. Endovıdeohırýrgııa, dıagnostıkalaý men emdeýdiń gormonaldyq ádisteri zamanaýı deńgeıde damyp, qaýipsizdigi jáne tıimdiligi joǵary dárilik preparattar tirkelip jatyr. Andrologııa, medısınalyq genetıka, embrıologııa men molekýlıarlyq bıologııa qarqyndy damyp keledi. Bunyń bári qosalqy reprodýktıvti tehnologııalardy tájirıbege belsendi túrde engizýge jol ashty.
Konferensııany Densaýlyq saqtaý mınıstrliginiń qoldaýymen Qazaqstan reprodýktıvtik medısına qaýymdastyǵy uıymdastyryp otyr.
ALMATY
