Konferensııada Densaýlyq saqtaý mınıstri Eljan Birtanov bıýdjettik EKU baǵdarlamasy arqasynda elimizde 2010-2018 jyldar aralyǵynda 2700 bala dúnıege kelgenin málimdedi.
Konferensııa jumysyna 18 eldiń aldyńǵy qatarly ǵylymı jáne klınıkalyq ortalyqtarynyń jetekshileri, akýsher-gınekolog dárigerler, EKU ortalyqtarynyń ókilderi, andrologtar, endokrınologtar, bedeýlikti emdeıtin mamandar, embrıologtar, genetıkter men molekýlıarlyq bıologtary qatysyp otyr.
«Sońǵy ondaǵan jylda álemde bedeýliktiń túrli formalaryn emdeýde úlken tájirıbe jınaldy. Qazirgi kezde bar tásilderdiń kóbi Qazaqstanda oıdaǵydaı engizilgen. Endovıdeohırýrgııa, dıagnostıkalaý men emdeýdiń gormonaldyq ádisteri zamanaýı deńgeıde damyp, qaýipsizdigi jáne tıimdiligi joǵary dárilik preparattar tirkelip jatyr. Andrologııa, medısınalyq genetıka, embrıologııa men molekýlıarlyq bıologııa tez qarqynmen damyp keledi. Bunyń bári qosalqy reprodýktıvti tehnologııalardy tájirıbege belsendi túrde engizýge jol ashty», – deıdi Qazaqstan reprodýktıvtik medısına qaýymdastyǵynyń prezıdenti, professor Vıacheslav Lokshın.
«Bedeýlik - dúnıejúzilik másele. Búginde elimizdegi bedeýlik jıiligi ortasha alǵanda 15 paıyzǵa jetip, odan azaımaı otyr. Olardyń basym bóligi kómekshi reprodýktıvti tehnologııalarǵa muqtaj. Osy halyqaralyq forýmda mamandar bedeýliktiń damýyna ákeletin aýrýlardyń aldyn alý, bedeý nekeni dıagnostıkalaý men emdeý, áleýmettik ádilettilik pen halyqtyń áleýmettik az qamtylǵan toptaryna qoldaý kórsetý sııaqty máselelerdi talqylap otyr. Jyl saıyn Qazaqstanda kómekshi reprodýktıvti tehnologııalardyń arqasynda 2500 dúnıege keledi. «Jalpy, bizdiń elde kómekshi reprodýktıvti tehnologııalardyń kómegimen 18200 bala dúnıege keldi. Osy jol arqyly bala súıgisi keletinder barshylyq. Bizde memleketten beriletin kvotaǵa kezekte turǵandar óte kóp. Bizge 8 myń kvota qajet. Ázirge jylyna 1500 kvota alyp otyrmyz», dedi Vıacheslav Lokshın.
ALMATY
