Bıyl qysqy kezeńde kútip ustaý jumystarymen halyqaralyq jáne respýblıkalyq joldardyń 24,9 myń shaqyrymy qamtamasyz etiledi dep josparlanýda. Joldardyń 21,1 myń shaqyrymy «Qazaqavtodor» kompanııasynyń balansynda. Al 3,4 myń shaqyrym jol nysandarda qaıta jańartý jumystaryn júrgizip jatqan merdigerlik uıymdardyń kútimine alynatyn bolady. Sonymen qatar joldardyń 422 shaqyrymy kúrdeli jóndeý jumystary júrip jatqan aýyspaly nysandarǵa jatady.
Qysqy kezeńge daıyndyq jumystary aǵymdaǵy jyldyń mamyrynda bastalǵan bolatyn. Shilde jáne tamyz aılarynyń aralyǵynda jol sharýashylyǵy obektileriniń qysqy kezeńdegi jumysqa ázirligi tekserildi.
Búgingi tańda óndiristik bazalardy, qazandyqtardy, jylyný pýnkteri men qoımalardy jóndeý jumystary aıaqtalý ústinde. Munymen qosa, tehnıkany qysqy kezeńge daıyndaý jumystary jalǵasyp jatyr. Qysqy kezeńde jumys isteıtin tehnıkanyń jalpy sany 1085 birlikti qurasa, olardyń 123 birligi jóndelýde. Tehnıka daıyndyǵy 91%-dan asady.
Joldardy qysqy kezeńge daıyndaý sharalary kesheniniń mańyzdy bóligi bolyp paıda bolatyn kóktaıǵaq sııaqty qubylystarǵa jedel den qoıý úshin qajetti materıaldardy daıyndaý sanalady. Taıǵaqqa qarsy materıaldar dóńderi, burylystary jáne eńisteri bar asa qaýipti joldarǵa shyǵarylady. Kásiporynnyń kúshimen eńister men rezervterdi aǵashtar men butalardan, jol jıekterin shópten tazartý jumystary júrgizildi. Jolshylar ýaqytsha «Taıǵaq jol», «Jyldamdyqty shekteý» sııaqty belgilerdi, sondaı-aq, qardan qorǵaý qalqandaryn daıyndady. О́ńirlerdiń klımattyq jaǵdaılaryna sáıkes sý ótkizgish qubyrlardyń tesikterin jabý jumystary júrgizilip jatyr.
