Kúzgi lagerge oblystaǵy bilim oshaqtarynan 50 bala iriktelip alynǵan eken. Barlyǵy birdeı qıyn balalar emes, arasynda belsendi ári úzdik oqýshylar da bar. Mamandar arnaıy josparly jumystaryn júrgizip, balalardyń ýaqytyn paıdaly ári qyzyqty ótkizýde.
– Kúzgi maýsymda túrli quqyq buzýshylyqtar jasaǵan jasóspirimdermen jumys júrgizý úshin balalardy jınadyq. Meniń oıymsha, jumystyń mundaı baǵyty, ıaǵnı jańa formaty tıimdi bolmaq. Tárbıeniń nátıjeli bolýy, olardyń tilinde sóılep, qyzyǵýshylyqtaryn bilý, – deıdi oblystyq kámeletke tolmaǵandardyń isi jónindegi mamandandyrylǵan aýdanaralyq sotynyń tóraıymy Aısulý Jumatova.
Jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý qajet ekeni belgili. Bıyl – Jastar jyly. Osy jyldyń sharapaty da az emes. Oblysta atqarylyp jatqan jumystardyń negizgi baǵyttarynyń biri balalardyń quqyqtary men zańdy múddelerin qorǵaý jáne olardyń ómir súrý sapasyn jaqsartý.
– Kámelettik jasqa jetpegen jasóspirimder arasyndaǵy quqyq buzýshylyqtyń aldyn alý maqsatynda kúzgi demalys kezinde alǵash ret lager uıymdastyrýdy uıǵardyq. «Balalyq shaqtyń planetasy» dep atalady. Maqsatymyz demalys ýaqytynda balalarmen kóbirek jumys isteý, – deıdi oblystyq bilim basqarmasy basshysynyń orynbasary Botagóz Dúısenova.
Balalarmen arnaıy mamandar túrli trenıngter ótkizýde. Sonymen qatar balalarǵa arnalǵan jobalar, forýmdar jáne is-sharalar arqyly oqýshylar óz pikirlerin ortaǵa salyp, jan-jaqty damýǵa múmkindik alyp otyr.
– Maǵan kúzgi lagerge barasyń degende qatty qýandym. Bul jerde ýaqytty óte kóńildi ótkizýdemiz, – deıdi Kókshetaý qalasyndaǵy №16 orta mekteptiń oqýshysy Aleksandr Strabykın.
Qıyn balalarmen jumys isteý de ońaı emes. Áıtse de burynǵy jattandy jumysqa qaraǵanda, tyńǵa salǵan soqpaq tıimdi bola ma degen úmit mol.
Aqmola oblysy
