Mamandar eskirgen stansııa buryn mundaı qýatpen jumys isteı almaıtyn edi deıdi. 2019 jyldyń basynda osy sý elektr stansııasyn jańǵyrtý baǵdarlamasynyń aıasynda árqaısysynyń qýaty 31,5 MVt bolatyn eki jańa sý agregaty paıdalanýǵa berilgennen keıin stansııadaǵy jumys qyza túsken.
«Jańa eki gıdroagregattyń jumysynan basqa, sý elektr stansııasynyń jospardy asyra oryndaýyna sebep bolǵan taǵy bir basty faktor – stansııanyń negizgi jáne qosalqy jabdyǵynyń apatsyz jumysy. Onyń ústine, Syrdarııa ózeninde de sý kólemi jetkilikti bolǵan. 2020 jyly biz Shardara sý elektr stansııasyndaǵy tehnıkalyq jańǵyrtý jumystaryn aıaqtaımyz dep josparlap otyrmyz, budan keıin onyń qýaty artyp, Túrkistan oblysyndaǵy elektr energııasynyń turaqty kózi bolyp qala beredi», – deıdi «Samuryq-Energo» AQ «Generasııa jáne otyn» departamentiniń dırektory Baǵlan Isenov.
Aıta keteıik, 2020 jyldyń birinshi jartysynda taǵy eki gıdroagregat josparǵa sáıkes qurastyrylsa, Shardara stansııasyn jańǵyrtý baǵdarlamasy aıaqtalady. Jobanyń jalpy quny 38 mlrd teńgeni quraıdy. Qarjynyń 32% óz qarajaty esebinen, 68% nesıege alynǵan. Jobanyń merdigeri – Andritz Hydro GmbX atty Avstrııa-Germanııa kompanııasy.
Jalpy, jańǵyrtý jumystary tolyq aıaqtalǵannan keıin, Shardara SES-iniń qýaty 126 MVt-qa deıin artpaq. Jańa jabdyq sý stansııasynyń qyzmet etý merzimin 35-40 jylǵa deıin ulǵaıtyp, SES-ti paıdalaný senimdiligin arttyrady jáne apattylyq deńgeıin tómendetedi. «Samuryq-Energo» AQ mamandarynyń sózinshe, bul joba energııa tapshylyǵyn sezinip otyrǵan Túrkistan oblysyn elektr energııasymen qamtamasyz etip, óńirdegi sý resýrstaryn paıdalanýdyń tıimdiligin arttyrýda úlken mańyzǵa ıe.
Tutas alǵanda, «Samuryq-Energo» AQ-nyń «Naryqty damytý» departamenti ázirlegen, Qazaqstannyń elektr energııasy men kómiri naryǵyna 2019 jyldyń qańtar-qyrkúıek kezeńinde jasalǵan taldaýǵa saı, 2019 jyldyń 9 aıynda kompanııanyń «taza» elektr energııasyn óndirýdegi úlesi (KES, JES, shaǵyn jáne iri SES-ter) 2018 jyldyń osyndaı kezeńimen salystyrǵanda (2 152,2 mln kVts) 11,3% artqan (2 395 mln kVts).
